Kinshasa Byakaze: Ubuyobozi Bwa Congo Bwinjiye Mu Bwirinzi Bukomeye Kubera Imyigaragambyo Yitezwe
Mu gihe impaka zishingiye ku ivugururwa ry’Itegeko Nshinga muri Repubulika Iharanira Demokarasi ya Congo zikomeje gufata indi ntera, ubuyobozi bwa Polisi y’Igihugu ya Congo (PNC) mu mujyi wa Kinshasa bwatangaje ko bwafashe ingamba zikomeye zo gukaza umutekano mbere y’igikorwa cyiswe “ville morte” cyateguwe n’abatavuga rumwe n’ubutegetsi.
Ibi byatangajwe nyuma y’inama ikomeye yayobowe na Komiseri wa Polisi mu Mujyi wa Kinshasa, Général Israël Kantu Bakulu, ku wa Kane tariki ya 28/05/2026. Iyo nama yahuje abayobozi bose b’inzego za polisi mu mujyi wa Kinshasa, barimo abakuriye za commissariats z’imijyi, imitwe ishinzwe ubutabazi bwihuse (GMI), urwego rushinzwe kurwanya ibyaha n’ibiyobyabwenge (GLCCS), ndetse n’ishami ry’ubutasi bwa polisi.
Mu butumwa bwatangiwe muri iyo nama, Polisi ya Kinshasa yatangaje ko yamaze gufata icyemezo cyo “gukumira hakiri kare ibikorwa byose bishobora guhungabanya umutekano” mu gihe abatavuga rumwe n’ubutegetsi bateganya imyigaragambyo yo kwamagana gahunda yo guhindura Itegeko Nshinga.
Ubuyobozi bwa Polisi bwagaragaje ko intego nyamukuru ari ugutanga umutekano ku baturage badafite aho bahuriye n’iyo myigaragambyo, kugira ngo bakomeze ibikorwa byabo bya buri munsi nta nkomyi.
Polisi kandi yaburiye ko umuntu wese wagerageza gutera abaturage, gukora urugomo cyangwa kwangiza ibikorwa by’abaturage azafatirwa ingamba zikomeye kandi zihuse.
Iyi myiteguro ya Polisi ije mu gihe muri RDC hakomeje impaka zikomeye ku mushinga wo kuvugurura Itegeko Nshinga, ibintu abatavuga rumwe n’ubutegetsi bavuga ko bishobora gufungurira Perezida Félix Tshisekedi inzira yo gukomeza kuyobora igihugu igihe kirenze icyo Itegeko Nshinga riteganya.
Mu byumweru bishize, amashyaka atavuga rumwe n’ubutegetsi ndetse n’imiryango imwe y’abaturage bakajije imyigaragambyo n’amagambo yamagana icyo bise “umugambi wo guhindura amategeko agamije inyungu za politiki.”
Ni mu gihe ubutegetsi bwa Kinshasa bwo buvuga ko ibiganiro ku Itegeko Nshinga ari uburenganzira bwa demokarasi kandi ko abaturage bafite uburenganzira bwo gutanga ibitekerezo ku buryo igihugu kiyoborwa.
Kuri ubu, mu bice byinshi bya Kinshasa haravugwa umwuka w’impungenge n’ubwoba, cyane cyane nyuma y’uko inzego z’umutekano zitangiye kongera umubare w’abapolisi mu mihanda no hafi y’ahantu hafatwa nk’ingenzi.
Abasesenguzi ba politiki bavuga ko uko ibintu bihagaze bishobora gukomeza guteza ubushyamirane hagati y’ubutegetsi n’abatavuga rumwe na bwo, cyane cyane mu gihe abaturage bamwe bavuga ko ubuzima bukomeje guhenda, ndetse n’ikibazo cy’umutekano muke mu Burasirazuba bwa Congo kigikomeje kuba ingorabahizi.
Hari kandi impungenge z’uko gukoresha ingufu nyinshi mu guhangana n’abigaragambya bishobora kongera umwuka mubi wa politiki no guteza amakimbirane hagati y’abaturage n’inzego z’umutekano.
Komiseri Général Israël Kantu Bakulu yasabye abapolisi bose gukorana ubushishozi, ubunyamwuga no gukaza amarondo aho bari hose, kugira ngo harindwe umutekano w’abaturage n’ibyabo.
Yanaburiye ko umuntu wese wagerageza guhungabanya ituze rya Kinshasa azafatwa nk’umwanzi w’umutekano rusange kandi agahanwa hakurikijwe amategeko.
Mu gihe abaturage bategereje kureba uko imyigaragambyo izagenda, amaso yose akomeje kwerekezwa i Kinshasa, aho ubushyamirane bwa politiki bushobora gufata indi ntera mu minsi iri imbere.
