Leta ya RDC Yakomeje Guha FDLR Intwaro n’Amasasu
Igisirikare cya Repubulika Iharanira Demokarasi ya Congo (FARDC) cyongeye gushinjwa gukomeza guha umutwe w’iterabwoba wa FDLR n’indi mitwe yitwaje intwaro ikorana na wo, ubufasha bukomeye burimo intwaro n’amasasu. Amakuru abivuga agaragaza ko hatanzwe toni zirenga eshanu z’amasasu, bigamije gufasha iyo mitwe mu mirwano ihanganyemo n’ihuriro AFC/M23.
Amakuru aturuka mu masoko atandukanye yizewe mu Ntara ya Kivu y’Amajyaruguru agaragaza ko tariki ya 14/01/2026, intwaro, amasasu n’amafaranga byashyikirijwe abayobozi bakuru ba FDLR, CMC/Domi na ANCDH/Nyatura. Iki gikorwa cyabereye ku kigo cya gisirikare cya FARDC giherereye i Pinga, muri teritwari ya Walikale.
Iri shyikirizwa ryitabiriwe n’abofisiye bakuru mu ngabo za RDC, barimo Col. Mokoko, ushinzwe ibikorwa mu Karere ka Gisirikare ka 34, Col. Salomon Tokolonga, uyobora Rejimenti ya 3402 akaba n’umuyobozi w’agateganyo w’ingabo zikorera i Pinga, ndetse na Col. Cyprien Semivumbi, umuhuzabikorwa w’imitwe ya Wazalendo mu Ntara ya Kivu y’Amajyaruguru.
Nubwo ubuyobozi bwa Leta ya RDC bwagiye buvuga ko ubufatanye n’imitwe irimo FDLR bukorwa n’abasirikare ku giti cyabo, uko igikorwa cyabereye i Pinga cyateguwe kandi kigashyirwa mu bikorwa ku mugaragaro bigaragaza ko ari gahunda ifite imizi mu nzego z’ubutegetsi, aho bidasa n’igikorwa cy’abantu ku giti cyabo.
Nyuma yo guhabwa izi ntwaro n’amasasu, abayobozi b’iyo mitwe bayijyanye mu bice byibasiwe n’imirwano ikaze birimo Bashali-Mokoto, Malemo na Buhimba muri teritwari ya Masisi, ndetse no mu bindi bice bya teritwari ya Rutshuru, mu Ntara ya Kivu y’Amajyaruguru.
Andi makuru akomeje kwemeza ko tariki ya 13/01/2026, i Pinga hoherejwe abacanshuro barenga 50 baturutse mu mutwe wa Blackwater, hagamijwe gufasha FARDC n’imitwe iyishamikiyeho mu gutegura no kugaba ibitero mu bice biherereye ku mupaka wa teritwari za Masisi na Walikale.
Si ubwa mbere ibi bivugwa. kuko tariki ya 28/12/2025, Leta ya RDC yari imaze kugeza i Pinga toni eshanu z’amasasu, maze ku munsi wakurikiyeho ayo masasu ahabwa FDLR, NDC-R n’indi mitwe ya Nyatura, hashingiwe ku mabwiriza yatanzwe na Col. Tokolonga.
Ubu bufasha FARDC ikomeje guha FDLR n’indi mitwe yitwaje intwaro, kimwe n’ikoreshwa ry’abacanshuro, bikomeje gushyira mu rujijo ubushake bwa Leta ya RDC mu kubahiriza amasezerano y’amahoro yagiranye n’u Rwanda tariki ya 27/06/2025, amasezerano yari yaragezweho ku bufatanye n’ubuhuza bwa Leta Zunze Ubumwe za Amerika.
Muri ayo masezerano, Leta ya RDC yari yemeye gufata ingamba zifatika zo gusenya umutwe wa FDLR. Icyakora, ibikorwa bikomeje kugaragara byo kuwushyigikira mu buryo bufatika bigaragaza ko urugendo rugana ku mahoro arambye mu burasirazuba bwa RDC rukiri rurerure kandi rufite imbogamizi zikomeye.