Leta ya RDC Yemeje Kohereza Abasirikare Bashya mu Misozi ya Minembwe, Isobanura Impamvu yabyo
MINEMBWE CAPITAL NEWS (MCN)
Guverinoma ya Repubulika Iharanira Demokarasi ya Congo (RDC) yatangaje ko ifite impungenge ku buryo umutekano ukomeje guhinduka mu misozi miremire ya Minembwe, iherereye mu Ntara ya Kivu y’Amajyepfo, ivuga ko imitwe ihanganye na Leta ikomeje kugaba ibitero no kwagura ibice igenzura.
Nk’uko byatangajwe n’ubuyobozi bw’i Kinshasa, ingabo nshya zoherejwe mu ndege zigamije kongera ubushobozi bw’ingabo za Leta zisanzwe ziri muri ako gace, ndetse no gushimangira ibikorwa byo kurinda ibirindiro bya FARDC mu misozi ya Minembwe.
Guverinoma ya RDC ikomeje kuvuga ko iri gufata ingamba zo guhangana n’ibibazo by’umutekano biri mu burasirazuba bw’igihugu. Ibi bibaye mu gihe amakuru aturuka mu bice bitandukanye by’imirwano avuga ko umutwe wa MRDP-Twirwaneho, ukorana ku rugamba na Alliance Fleuve Congo (AFC/M23), ukomeje guhangana n’ihuriro rigizwe n’ingabo za Leta (FARDC), ingabo z’u Burundi, imitwe ya Wazalendo ndetse na FDLR.
Amakuru aturuka mu duce twegereye ibibuga by’imirwano avuga ko hari uduce tumwe na tumwe twagiye duhindura amaboko mu minsi ishize, turimo Gakenge, Rwitsankuku, Point Zéro ndetse n’utundi duce two mu karere ka Mibunda muri Teritwari ya Mwenga.
Ku rundi ruhande, Guverinoma ya RDC yakomeje gushinja AFC/M23 gukoresha uburyo butandukanye bw’intambara, burimo n’ikoranabuhanga mu bikorwa byayo bya gisirikare. Icyakora, ku birebana n’ibivugwa ku ikoreshwa rya drone n’impande zihanganye, kugeza ubu nta bimenyetso byigenga byemeza ku buryo bwuzuye ibyo birego.
Hagati aho, abaturage bo mu misozi miremire ya Minembwe bakomeje kugaragaza impungenge zishingiye ku ntambara imaze igihe muri ako karere. Bamwe mu baturage ndetse n’imiryango iharanira uburenganzira bwa muntu bagaragaje ko ibitero by’indege zitagira abapilote (drones) byagiye bigira ingaruka ku baturage, zirimo kwangirika kw’amazu n’ibindi bikorwa remezo, ndetse hakaba haravuzwe n’abantu baguye muri ibyo bitero abandi bagakomereka.
Abasesenguzi b’ibibazo by’umutekano mu burasirazuba bwa RDC bavuga ko gukomeza gukwirakwira kw’imirwano mu misozi ya Minembwe no mu bice bya Mwenga na Fizi bishobora kongera ibibazo by’ubutabazi, kwimura abaturage ndetse no gukomeza guhungabanya umutekano w’akarere kose.
Mu gihe ibikorwa bya gisirikare bikomeje, abaturage bakomeje gusaba ko haboneka ibisubizo birambye bigamije kugarura amahoro, kurinda abasivili no kubahiriza amategeko mpuzamahanga arengera abaturage bari mu bihe by’intambara.
