M23 yibukije FARDC icyo igomba gukora mu maguru mashya.
Umutwe wa M23 wibukije ihuriro ry’ingabo za Congo ziri mu mujyi wa Goma ko amasaha 48 zahawe yo kuba zarambitse imbunda zabo hasi yegereje, kandi ko abaturage b’i Goma bagize igihe ba babaye bakeneye kubohorwa.
Bikubiye mu butumwa umuvugizi wa M23 mu bya politiki, Lawrence Kanyuka yatangaje mu gitondo cyo kuri uyu wo ku Cyumweru tariki ya 26/01/2025.
Muri ubu butumwa bwa Kanyuka yatangaje akoresheje urubuga rwe rwa x, yagize ati: “AFC/M23 iributsa abanyamuryango bose ba FARDC bari i Goma ko amasaha 48 mwahawe yo kuba mwarambitse imbunda hasi yegereje. Abaturage ba Goma bababaye cyane, bakeneye kubohorwa.”
Ku mugoroba w’ahar’ejo nibwo umutwe wa M23 wahaye ihuriro ry’Ingabo za RDC ziri mu mujyi wa Goma, amasaha 48 yo kuba zarambitse imbunda hasi, ubundi ingabo z’uyu mutwe zigahita ziwinjira zikawutangamo amahoro n’umutekano nk’uko n’ahandi zafashe zihatanga amahoro.
Mu itangazo uwo mutwe washyize hanze wagize uti: “AFC/M23 irasaba ingabo za Congo ziri i Goma no mu nkengero zaho gushyira hasi imbunda bitarenze amasaha 48. Umujyi wa Goma ntukwiye gukoreshwa nk’ikibuga cy’imirwano, bityo umuryango wacu ntabwo uzihanganira na rimwe umutwe uwo ari wo wose ushyira abaturage b’abasivile mu makimbirane.”
Hagataho, imirwano hagati ya M23 n’ihuriro ry’Ingabo zirwana ku ruhande rwa Leta yakomeje, aho muri iki gitondo cyo kuri uyu wo ku Cyumweru iri kubera mu duce twinshi duherereye muri teritware ya Nyiragongo.
Amakuru ava muri ibyo bice avuga ko imbunda ziremereye n’izito zirimo kumvikanira ahitwa Buhombo, Kiheru, Kasenyi hafi ya Munigi.
Ariko nk’uko iyi nkuru ikomeza ibivuga ingabo zo ku ruhande rwa Leta riri kurwana risubira inyuma, ndetse kandi ko uyu mutwe wa M23 wo ukomeje kwigarurira utundi duce ahanini turi mu nkengero z’uyu mujyi wa Goma.
Bikavugwa ko isaha iyariyo yose uwo mutwe wa M23 ushobora kwigarurira Goma ifatwa nk’umurwa mukuru w’i Ntara ya Kivu Yaruguru.