M23 yigaruriye akandi gace ki ngenzi muri Kivu Yaruguru, ibyatumye haba indi sura nshya y’urugamba.
Umutwe urwanya ubutegetsi bwa perezida Félix Tshisekedi Tshilombo wa M23 wongeye kwigarurira undi mujyi muto wingenzi wo muri teritware ya Lubero mu ntara ya Kivu y’Amajyaruguru.
Ku manywa yo ku munsi w’ejo hashize tariki ya 18/12/2024 ni bwo M23 yirukanye ihuriro ry’Ingabo z’ubutegetsi bwa Kinshasa mu mujyi wa Mbingi.
Aka gace gaherereye muri teritware ya Lubero mu majyaruguru y’u Burasirazuba bwa Repubulika ya demokarasi ya Congo.
Amakuru ava muri ibyo bice avuga ko M23 yafashe aka gace nyuma yimirwano ikomeye yabaye hagati y’impande zombi.
Ni imirwano yasize uruhande rw’urwanirira Leta ya Kinshasa ruyabangiye ingata.
Mbere yo gufata Mbingi, M23 yari imaze kwigarurira utundi duce twinshi two muri ako karere, harimo n’indi mijyi minini, nk’umujyi wa Matembe, Alimbongo na Mambasa.
Ifatwa ry’umujyi wa Mbingi ryongeye gutuma abayobozi bahamagarira abaturage baturiye Butembo guhaguruka bakarwanirira ubutaka bw’igihugu cyabo.
Perezida wa sosiyete sivile i Butembo, Mathe Sanane, yemeje ko ingabo za FARDC zahunze mu majyi wa Mbingi, kandi ko zawugiye kure.
Yagize ati: “Ntabwo tuzi aho abarwanyi ba M23 bari, ariko ibintu birakomeye kuko FARDC yahunze muri Mbingi.”
Yakomeje avuga ko kuva ku Cyumweru M23 yakomeje kwigarurira uduce twinshi mu buryo butari busanzwe muri teritware ya Lubero.
Gusa aza gusaba abaturage ba Butembo gutekana, ariko bakitegurira kwirwanaho.
Ati: “Turasaba abaturage gukomeza gutuza, ariko twitegure kwirwanaho bibaye ngombwa.”
Hari amakuru avuga ko abarwayi ba M23 mbere y’uko bafata Mbingi babanje gukoresha drone barasa ku ngabo za FARDC, bituma zicika intege zikizwa n’amaguru.
Kuri ubu abarwanyi ba M23 bari nko ku birometero 100 uvuye mu mujyi wa Butembo, ibi bikaba bikomeje gutera ubwoba ko na Butembo ija mu maboko yabo. Ku ruhande rwa FARDC haravugwamo gucika intege kuko ikomeje gutakaza ibice byinshi kandi byingenzi.
