MASISI: AFC/M23 na FARDC bongeye guhangana mu mirwano ikomeye
Imirwano ikaze yongeye kubura kuri iki Cyumweru, tariki ya 29/03/2026, mu gace ka Osso Banyungu, gaherereye muri teritwari ya Masisi, mu Ntara ya Kivu y’Amajyaruguru, aho ihuriro Alliance Fleuve Congo (AFC/M23) rihanganye n’ingabo za Repubulika Iharanira Demokarasi ya Congo (FARDC), ku bufatanye n’imitwe yitwaje intwaro ya Wazalendo na FDLR.
Amakuru aturuka mu baturage n’abari hafi y’aho imirwano ibera agaragaza ko uru rugamba rwatangiye mu masaha ya kare ya mu gitondo, ahagana saa moya (07h00), ubwo AFC/M23 yagabwaho ibitero na FARDC, Wazalendo na FDLR mu duce twa Kazinga na Ngululu. Utu duce twombi twari tumaze iminsi turi mu maboko ya AFC/M23, bikaba byaratumye duhinduka isibaniro ry’imirwano ikomeye, buri ruhande rushaka kongera kubufatamo ububasha. Icyakora, amakuru akomeza avuga ko AFC/M23 yaje gusubiza inyuma abayigabyeho ibitero.
Ku rugamba, haravugwa urusaku rukomeye rw’imbunda ziremereye n’izoroheje rwumvikana ubudahwema, bigaragaza ubukana bw’imirwano iri kubera muri ako gace. Ayo masasu yakomeje kumvikana no mu bindi byaro bihana imbibi n’aho imirwano iri, ndetse no mu bice bimwe bya teritwari ya Walikale ihana imbibi na Masisi, ibintu byateje ubwoba n’ihungabana rikomeye mu baturage basanzwe badafite aho bahungira.
Iyi mirwano yongeye kubura mu gihe akarere k’Uburasirazuba bwa Repubulika Iharanira Demokarasi ya Congo kari mu bihe by’impinduka zikomeye mu bya gisirikare. Nubwo hari amakuru yagiye atangazwa ko AFC/M23 yatangiye kugabanya ibikorwa byayo cyangwa gusubira inyuma mu duce tumwe two muri Walikale, Lubero na Rutshuru, muri Masisi ho ntiharagaragara impinduka zikomeye. Ahubwo, umutekano ukomeje kuba muke, ibintu bikomeje kongera impungenge ku hazaza h’aka karere.
Amateka y’aka gace ka Masisi agaragaza ko kamaze igihe kirekire karangwa n’imirwano ihoraho ihuza imitwe itandukanye yitwaje intwaro, bitewe ahanini n’inyungu z’ubutaka, umutungo kamere ndetse n’amakimbirane ashingiye ku moko n’imiyoborere. Ibi byatumye aka karere kaguma mu bibazo by’umutekano muke n’ihohoterwa rikorerwa abasivili.
Kugeza ubu, abaturage bo muri Osso Banyungu n’inkengero zaho bakomeje kuba mu kaga gakomeye, bamwe batangiye guhunga ingo zabo bashaka ubuhungiro, mu gihe abandi bagihanganye n’ingaruka z’iyi mirwano irimo gukara. Hari impungenge ko niba nta gikozwe vuba, umutekano ushobora kurushaho kuzamba, ugashyira mu kaga ubuzima bw’abaturage benshi kurushaho.
Abasesenguzi mu bya politiki n’umutekano bakomeje gusaba impande ziri mu mirwano gushyira imbere inzira z’ibiganiro n’amahoro, mu rwego rwo guhosha iyi ntambara imaze igihe isenya ubuzima bw’abaturage bo mu Burasirazuba bwa RDC.
