Mbonimpa Yohereje Ubutumwa Bukomeye kuri Tshisekedi: Ibyo FRN Ivuga ku Ntsinzi Yayo Birasobanutse!
Minembwe Capital News (MCN)
Benjamin Mbonimpa, Umunyamabanga Mukuru Wungirije w’umutwe wa politiki n’igisirikare wa Front pour la Refondation de la Nation (FRN), yaburiye Perezida wa Repubulika Iharanira Demokarasi ya Congo, Félix Tshisekedi, n’ubutegetsi bwe ku bijyanye n’imyitwarire yabo mu ntambara ikomeje kubera mu burasirazuba bw’icyo gihugu.
Mu butumwa yanyujije ku mbuga nkoranyambaga kuri uyu wa Gatanu, tariki ya 20/11/2026, Mbonimpa yanenze ibyo yise guceceka kudasobanutse kw’abakurikirana amakuru y’intambara n’abashinzwe guhuza impande zihanganye, bagamije gushakira amakimbirane umuti w’amahoro, mu gihe ubutegetsi bwa Kinshasa bushinjwa gusenya ibikorwa remezo no kwica abasivili.
Muri ubwo butumwa, Mbonimpa yagaragaje ko atumva impamvu abarebera hamwe n’abahuza mu biganiro by’amahoro batagaragaza imyitwarire imwe mu gukurikirana ibikorwa bya gisirikare bya Kinshasa, cyane cyane ku birebana n’ibyo FRN ivuga ko ari ugusenya ibikorwa remezo no kwibasira abasivili.
Yagize ati:
“Nk’uko tubona guceceka kw’abarebera hamwe n’abashinzwe guhuza impande zihanganye mu ntambara, mu gihe Kinshasa isenya ibikorwa remezo ikanica abasivili, ni na ko bizagenda igihe Umuryango wacu uzaba utsinze abo twita ingabo z’urupfu, ari bo FARDC n’abafatanyabikorwa bazo bose.”
Mbonimpa yanenze ibyo abona nk’imikorere ibogamye mu gukurikirana ibikorwa by’impande zihanganye mu ntambara. Yashimangiye kandi ko FRN ifite icyizere cyo gutsinda ingabo za Leta ya Congo, FARDC, n’abo bafatanyije mu mirwano.
Ubutumwa bwa Mbonimpa burimo umuburo ugenewe ubutegetsi bwa Perezida Félix Tshisekedi ndetse n’abagize uruhare mu bikorwa byo gushaka igisubizo cy’amahoro. Yagaragaje ko FRN itazemera ko ibikorwa by’uruhande rumwe byirengagizwa, mu gihe iby’uruhande rwayo bihita bigenzurwa.
Minembwe Capital News (MCN)
