Menya Ibice MRDP-Twirwaneho na AFC/M23 Bamaze Kubohoza muri Teritwari ya Mwenga, Aho Bakomeje Kwagura Ibirindiro muri Secteur ya Itombwe
MINEMBWE CAPITAL NEWS (MCN)
Mu gihe imirwano ikomeje guhindura isura y’umutekano mu burasirazuba bwa Repubulika Iharanira Demokarasi ya Congo (RDC), umutwe wa MRDP-Twirwaneho, ufatanyije na Alliance Fleuve Congo (AFC/M23), ukomeje kwagura ibice ugenzura muri Secteur ya Itombwe, iherereye muri Teritwari ya Mwenga, mu Ntara ya Kivu y’Amajyepfo.
Amakuru aturuka mu baturage bo muri ako gace ndetse no mu yandi masoko yizewe avuga ko nyuma yo kwigarurira Mikenge, izi ngabo zakomeje ibikorwa bya gisirikare ku muvuduko mwinshi, zigenda zifata ibindi bice bitandukanye, aho bivugwa ko nta mirwano ikomeye yazibujije gukomeza imbere.
Amakuru ahari agaragaza ko mu mpera z’icyumweru gishize, uduce twa Kipupu, Kiseke na Kalulu twinjiye mu bice bigenzurwa na MRDP-Twirwaneho na AFC/M23. Ku Cyumweru, tariki ya 26/07/2026, amakuru yizewe Minembwe Capital News (MCN) yahawe agaragaza ko na Senge yamaze kujya mu maboko y’izo ngabo.
Andi makuru ava muri ibyo bice avuga ko uduce twa Kitopu na Mike dusigaye turi mu nkengero z’ibice bigenzurwa n’izi ngabo, ibintu byerekana ko ibikorwa byazo bikomeje kwaguka ku muvuduko munini.
Abakurikiranira hafi ibibera muri Kivu y’Amajyepfo bavuga ko umuvuduko MRDP-Twirwaneho na AFC/M23 bafite muri iyi minsi ugaragaza ubushobozi bwa gisirikare buri hejuru, kuko bakomeje kwigarurira ibice bishya mu buryo bwihuse kandi batagize imbogamizi zikomeye zigaragara.
Hagati aho, mu masaha ashize hakomeje gukwirakwira amakuru ku mbuga nkoranyambaga avuga ko izi ngabo zamaze gufata Centre ya Kamituga. Icyakora, amakuru Minembwe Capital News (MCN) yakusanyije agaragaza ko ayo makuru atarahura n’ukuri. Kugeza ubu, nta gihamya yizewe yemeza ko Kamituga yamaze kwigarurirwa.
Nubwo bimeze bityo, amakuru aturuka ku masoko atandukanye agaragaza ko ingabo za MRDP-Twirwaneho na AFC/M23 zikomeje kwegera ako gace. Bamwe mu bakurikiranira hafi ibibera ku rugamba bavuga ko bishoboka ko Kamituga yaba iri mu ntego zazo mu gihe cya vuba, nubwo ibyo bizaterwa n’uko ibikorwa bya gisirikare bizagenda.
Abaturage bo muri Teritwari ya Mwenga bakomeje gukurikiranira hafi uko ibintu bihinduka umunsi ku wundi, mu gihe impande zihanganye zikomeje ibikorwa bya gisirikare bishobora kongera guhindura ishusho y’igenzura ry’ibice bitandukanye muri Kivu y’Amajyepfo.
Minembwe Capital News (MCN) ikomeje gukurikirana aya makuru hafi kandi izakomeza kubagezaho amakuru yizewe uko agenda avugururwa.