Mibunda: Imirwano itaravuzwe hagati ya Red-Tabara n’ingabo z’u Burundi.
Umutwe witwaje intwaro urwanya Leta ya Gitega wa Red-Tabara, uheruka kugaba igitero gikomeye mu birindiro by’ingabo z’u Burundi zo mu mutwe wa TAFOC n’ibya Maï-Maï iyobowe na Gen Hamuri Yakutumba biherereye i Tabunde mu Mibunda muri teritware ya Mwenga mu ntara ya Kivu y’Amajyepfo, nk’uko amakuru ava muri ibyo bice abivuga.
Ni mu mpera z’i cyumweru gishize ni bwo Red-Tabara yagabye kiriya gitero ikigaba ahitwa i Tabunde hazwi nko mu Mibunda muri Secteur ya Itombwe, aha hakaba hari ikambi y’igisikare cy’u Burundi na Wazalendo iyobowe na Jenerali Hamuri Yakutumba.
Nk’uko abaturiye ibyo bice babibwiye Minembwe.com, iki gitero cyaguyemo abo ku ruhande rw’u Burundi na Maï-Maï babarirwa 18 harimo n’abandi imirongo bakomeretse.
Bavuga ko abakomeretse bahise bajanwa ku bitaro bikuru bya Mikenke biherereye hafi n’umuhana munini w’Ababembe uba muri aka gace.
Ikindi kandi nuko ibyo birindiro by’ingabo z’u Burundi na Maï-Maï byari i Tabunde nyuma y’aho bigabweho igitero zikabihunga, abarwanyi b’uyu mutwe wa Red-Tabara bahise babiha inkongi y’umuriro, ubundi birashya birakongoka, nk’uko aya makuru akomeza abivuga.
Abaturage baturiye utwo duce, byavuzwe ko amatungo yabo arimo ihene, inkoko n’intama yahise anyagwa, kandi bikavugwa ko yanyazwe n’abarwanyi ba General Hamuri Yakutumba.
Gusa nta mubare wayo wavuzwe.
Iki gitero cya Red-Tabara muri Mibunda kibaye ku nshuro igira gatanu mu gihe kitarenze igihe cy’amezi atatu gusa.
Ni mu gihe mu kwezi kwa Cumi n’abiri ku mwaka ushize wa 2024, uyu mutwe wa Red-Tabara urwanya ubutegetsi bw’u Burundi wakugabyemo ibitero byikurikiranyije inshuro zitatu. Ibyo bitero nabyo wagiye ubigaba ku nyeshamba z’uyu mutwe wa Maï-Maï ubundi ukabigaba aha herereye ingabo z’u Burundi zo mu itsinda rya TAFOC zisanzwe zikorana byahafi n’i nyeshamba za Maï-Maï na FDLR ndetse na FARDC.
Ni ibitero byahitanye ubuzima bw’ingabo z’u Burundi nyinshi, harimo ko byaguyemo n’abafite amapeti ya Colonel, nk’uko uyu mutwe wa Red-Tabara wabyigabye umwaka ushize.
Mu kwezi kwa Cumi n’umwe naho, Red-Tabara yakugabyemo ibitero bikomeye. Ariko igaba ibyo bitero yamara kwirukana Maï-Maï n’ingabo z’u Burundi ikongera igasubira mu ishyamba.
