MRDP–Twirwaneho Yakiriye Aba-Cadre Bashya, Igaragaza Kwagura Umusingi wa Politiki n’Ubwitabire bw’Abaturage mu Burasirazuba bwa RDC
Umutwe wa politiki n’igisirikare wa MRDP–Twirwaneho ukorera mu misozi miremire y’i Mulenge, mu Ntara ya Kivu y’Amajyepfo, wakiriye aba-cadre politiki bashya, mu gikorwa cyagaragaje intambwe nshya mu kwagura ibikorwa byawo no gushaka gushyigikirwa n’abaturage batandukanye.
Nk’uko byatangajwe mu gihe cyo kubakira, aba-cadre bashya baturutse mu bice bitandukanye byo mu burasirazuba bwa Repubulika Iharanira Demokarasi ya Congo, birimo Uvira na Bukavu, umurwa mukuru w’Intara ya Kivu y’Amajyepfo. Iki gikorwa cyo kubakira cyabaye tariki ya 20/03/2026, nubwo aba-cadre bavuga ko bari bamaze amezi atatu bari mu Minembwe.
Mu mashusho yashyizwe ahagaragara, hagaragaye abantu bane bari muri iki gikorwa, ariko ubuyobozi bwa MRDP–Twirwaneho bwatangaje ko umubare w’abinjiye muri uwo mutwe urenze abo bagaragaye. Colonel Rugabo, umwe mu bayobozi bakiriye abo ba-cadre, yavuze ko uyu mutwe ugamije guhuza Abanyekongo bose, hatitawe ku moko yabo.
Yagize ati: “MRDP–Twirwaneho ni umutwe ugenewe Abanyekongo bose, barimo Ababembe, Abapfulero n’Abanyamulenge. Turashaka ko buri wese yumva ko ari uwe.”
Yakomeje ashimangira ko intego y’uyu mutwe ari ukugira ishyaka rihuza abaturage bose, rigaharanira inyungu zabo rusange, mu gihe igihugu gikomeje guhura n’ibibazo by’umutekano muke cyane cyane mu burasirazuba bwacyo.
Aba-cadre bashya na bo bagaragaje impamvu yabateye kwinjira muri MRDP–Twirwaneho, bavuga ko bashaka gusobanukirwa neza ikibazo cy’intambara Abanyamulenge bamaze igihe bahura na yo, ndetse no kugira uruhare mu gushaka ibisubizo birambye.
Umwe muri bo, wivuze ko akomoka mu bwoko bw’Abavira wo mu gace ka Uvira, yavuze ko yababajwe n’ibibazo by’umutekano muke byibasira Abanyamulenge. Yagize ati: “Nk’Umuvira, natewe agahinda n’intambara iri kuba ku Banyamulenge. Ntitwumva impamvu bakomeza kwibasirwa. Hari abavuga ko atari Abanyekongo, nyamara tuzi neza ko ari abaturage b’iki gihugu. Twahisemo kuza kubafasha no gushyigikira urugamba rwo kurwanya akarengane.”
Aba ba-cadre bashinja ubutegetsi bw’i Kinshasa buyobowe na Perezida Félix Tshisekedi kugira uruhare mu bibazo by’umutekano muke, bavuga ko bufatanya n’imitwe yitwaje intwaro irimo Wazalendo, FDLR ndetse n’ingabo z’u Burundi, mu bikorwa bavuga ko bigamije guhungabanya umutekano w’Abanyamulenge, birimo ibitero, ubwicanyi no kunyaga amatungo yabo.
Ibi bibaye mu gihe uburasirazuba bwa RDC bumaze imyaka myinshi burangwa n’umutekano muke uterwa n’imitwe myinshi yitwaje intwaro, amakimbirane ashingiye ku moko n’ubutaka, ndetse n’inyungu z’ubukungu zishingiye ku mutungo kamere w’iki gihugu. Intara ya Kivu y’Amajyepfo, by’umwihariko, yakunze kugaragaramo ibikorwa by’urugomo n’intambara z’urudaca, bigira ingaruka zikomeye ku baturage.
Kwiyongera kw’aba-cadre muri MRDP–Twirwaneho bishobora kugaragaza icyerekezo cy’uyu mutwe mu gushaka kwagura imbaraga zawo no kugira ijambo rikomeye muri politiki n’umutekano by’akarere, nubwo hakiri impungenge ku ngaruka z’imitwe yitwaje intwaro ikomeza kwiyongera mu gihugu.
