MRDP-Twirwaneho yigambye kuvugutira umuti FARDC, Wazalendo n’ingabo z’u Burundi mu mirwano yo muri Kivu y’Amajyepfo
MRDP-Twirwaneho yatangaje ko yatsinze ibitero by’ingabo za Repubulika Iharanira Demokarasi ya Congo (FARDC), imitwe y’abarwanyi ba Wazalendo ndetse n’ingabo z’u Burundi, mu mirwano yabereye mu bice bitandukanye bikikije Minembwe, muri Teritwari ya Fizi, Intara ya Kivu y’Amajyepfo.
Ibi byatangajwe kuri uyu munsi, tariki ya 28/09/2026, na Colonel Fidèle Rugabo, umwe mu bofisiye bakuru ba MRDP-Twirwaneho, mu butumwa yatanze ku bijyanye n’imirwano yabereye mu bice bya Rugezi, Gipimo no kwa Nzohaha.
Col. Rugabo yavuze ko FARDC, ingabo z’u Burundi, FDLR na Wazalendo batsinzwe bikomeye, avuga ko bamwe mu bari mu mirwano bahise basubira inyuma berekeza mu byerekezo bitandukanye.
Ati: “FARDC, FNDB, FDLR na Wazalendo bakubiswe nk’ingoma mu Rugezi, Gipimo na kwa Nzohaha. Bose batataniye mu byerekezo bitandukanye.”
Yakomeje avuga ko MRDP-Twirwaneho ikomeje kurinda abaturage, ashinja impande bahanganye kugaba ibitero mu bice bituwe n’abasivili.
Ati: “Twebwe MRDP/M23 dukomeje kurinda abaturage bari kugabwaho ibitero. Tuzatsindana iyi ntambara ishema. Urugamba rurakomeje.”
AFC/M23 nayo yatangaje ko habaye ibitero bikomeye
Aya magambo ya Col. Fidèle Rugabo aje akurikira amakuru yatangajwe na Lawrence Kanyuka, umuvugizi w’ihuriro AFC/M23, mu gitondo cyo ku wa Mbere, tariki ya 27/09/2026.
Kanyuka yavuze ko ihuriro ry’imitwe ishyigikiye Leta ya RDC ryagabye ibitero mu bice birimo Gipimo, Rugezi, Kuwihene n’ahandi hafi yabyo.
Yavuze ko ibyo bitero byagabwe n’ingabo zirwanira ku butaka, zifashishije za mortier za mm 82 ndetse na drones z’intambara.
AFC/M23 kandi yatangaje ko habaye ikindi gitero mu gace ka Point Zéro, aho yavuze ko hakoreshejwe mortier za mm 107 na mm 120.
MRDP-Twirwaneho ivuga ko yakubise abasirikare n’abarwanyi bahanganye na yo
Mu itangazo rye, Col. Rugabo yashimangiye ko imirwano yabereye mu Rugezi, Gipimo no kwa Nzohaha yasize FARDC, ingabo z’u Burundi, FDLR na Wazalendo basubiye inyuma.
Ibi bivuze ko MRDP-Twirwaneho yigambye ko yakubise bikomeye impande zose z’ingabo n’imitwe yari ihanganye na yo muri ibyo bice.
Imirwano ikomeje hafi ya Minembwe
Ingabo za Leta ya RDC zimaze iminsi zigaba ibikorwa bya gisirikare mu bice bikikije Minembwe, mu rwego rwo kugerageza kongera kugenzura ibice bitandukanye.
Ku rundi ruhande, AFC/M23 na MRDP-Twirwaneho bakomeje kuvuga ko ibikorwa bya gisirikare by’ingabo za Leta ya RDC n’abafatanyabikorwa babo bigira ingaruka ku baturage, barimo abicwa ndetse n’abahatirwa guhunga ingo zabo.
MINEMBWE CAPITAL NEWS (MCN)
