Mu gihe FARDC yigambye ubutsinzi, M23 yo, yatangaje ibindi bikaze.
Mu gitondo cyo kuri uyu wa Kabiri tariki ya 17/09/2024, hazindukiye imirwano ikaze mu duce twinshi two muri Kivu Yaruguru, hagati y’ihuriro ry’Ingabo z’ubutegetsi bwa Kinshasa n’umutwe wa M23 ugize igihe warazengereje ubutegetsi bwa perezida Félix Tshisekedi, nk’uko amakuru ava muri ibyo bice abivuga.
Impande zombi zongeye ku rwana mu gihe n’ejo hashize hari habaye imirwano ikaze, aho yabereye mu duce two muri Grupema ya Bambo ho muri Rutshuru.
Impande zombi zaherukaga ku rwana ku wa Kane w’iki Cyumweru dusoje.
Akoresheje urubuga rwa x, umuvugizi wa M23 mu bya politiki, Lawrence Kanyuka yatangaje ko ahagana isaha ya saa sita zamanywa zo kuri uyu wa Kabiri, ihuriro ry’Ingabo za RDC zagabye ibitero mu bice bituwe n’abaturage benshi kandi avuga ko ibi bitero byagabwe mu duce twinshi.
Yagize ati: “Mu masaha ya saa sita zamanywa, ibitero by’ihuriro ry’ingabo zirwana ku ruhande rwa Leta, byibasiye uturere dutuwe cyane, nk’ahitwa i Lokopfu, Gisuma, Bufaransa na Zunguruka.”
Yakomeje agira ati: “Ibi bitero byatumye abaturage benshi babura ubuzima, abandi nabo bagana iyu buhungiro, ndetse ibi n’ibikorwa byiterabwoba bikorwa n’ubutegetsi bwa Kinshasa.”
Kanyuka yanavuze ko ingabo zabo zikomeje ibikorwa byo kurengera abaturage nk’uko biri mu nshingano zabo.
Ati: “Ingabo z’impundura matwara za ARC, zikomeje gukora inshingano zabo zo kurinda abaturage.”
Ibyo bibaye mu gihe ingabo za FARDC kuri uyu wa mbere tariki ya 16/09/2024, zigambye kwambura M23 uduce two muri teritware ya Rutshuru, nubwo ntacyo M23 irabivugaho.
Mu butumwa FARDC yanyujije ku rubuga rwayo rwa x ku munsi w’ejo hashize, yavuze ko mu mirwano yabashamiranije na M23 yasize iz’ingabo zigaruriye tumwe mu duce twagenzurwa n’umutwe wa M23.
Iti: “FARDC yashoboye kwigarurira, inabohora ibice byinshi by’ingenzi muri teritware ya Rutshuru. Iyi ntsinzi ikomeye ni igihamya cyo gushikama ku ntego twihaye yo kugarura amahoro, umutekano n’ubusugire bw’igihugu cyacu.”
Yakomeje ivuga ko ‘izakomeza kurwana kugira ngo yisubize ibice byose byafashwe na m23.’
Kugeza ubu ntacyo umutwe wa M23 uratangaza ku byavuzwe n’ingabo za RDC.
Ariko kandi igisirikare cya Repubulika ya demokarasi ya Congo, cyakunze kwigamba ibinyoma, aho cyagiye gitangaza kenshi ko hari uduce cyambuye umutwe wa M23 bikarangira bibaye ibinyoma.
Hagati aho, hari ubwoba ko hashobora kubura imirwano ikaze kurushyaho ndetse ikaba yagera no mu mujyi wa Goma, nyuma y’uko uyu mutwe wagiye ugaragaza ko ubabajwe n’ubwicanyi bukorerwa abasivile i Goma no mu nkengero zayo.
Ndetse kandi uyu mutwe wa M23 uheruka gutangaza ko impande zombi zishobora kwisanga mu mirwano ikomeye, ni mu gihe washinjaga iri huriro ry’ingabo za Guverinoma ya Kinshasa ku wugabaho ibitero no mu bice bisanzwe bituwe n’abaturage benshi.
MCN.
