Mwenga: Abapfulero barimo n’umu-Chef, bahunze ingabo za Leta n’ingabo z’u Burundi.
Chef Karabaja wo mu bwoko bw’Abapfulero warutwaye agace ka i Lulu muri Secteur ya Itombwe, teritwari ya Mwenga, yahungiye mu duce tugenzurwa n’inyeshamba zo mu mutwe wa Red-Tabara; akaba yahunganye n’abaturage benshi ba Bapfulero.
Amasoko yacu yemeza ko Chef Karabaja n’abaturage yari ayoboye bahunze ingabo za FARDC n’abambari bayo kuko batizeye umutekano wabo.
Ni nyuma yuko ku mugoroba wo ku wa kabiri tariki ya 10/12/2024 ingabo za FARDC, ingabo z’u Burundi na Maï Maï zagabye igitero gikaze ahitwa Tabunde.
Aka gace ka Tabunde gaherereye muri Localite ya i Lulu yarebwaga na Chef Karabaja wahungiye ahagenzurwa na Red-Tabara.
Mu mpera za kiriya cyumweru gishize ni bwo umutwe wa Red-Tabara wirukanye Maï Maï n’ingabo z’u Burundi muri Tabunde; maze izi nyeshamba zihashinga ibirindiro, ibyatumye ihuriro ry’ingabo za Leta ya Kinshasa, ingabo z’u Burundi na Maï Maï bakigabaho igitero birangira zibyigaruriye n’inkengero zabyo.
Nyuma yuko abarwana ku ruhande rwa Leta bafashe i Lulu n’inkengero zayo abahaturiye bo bahisemo kuhahunga.
Aya makuru akomeza avuga ko aba baturage bahunganye na Chef Karabaja bahungiye i Lungulungu aho Red-Tabara igenzura.
Hagati aho, FARDC n’abambari bayo bahise batwika imihana yose yo muri ako gace yabagamo Abapfulero; bikavugwa ko yahiye irakongoka. Iyahiye irimo uwa Tabunde, Malingi, Kabanju n’ahandi.
