Oliver Rumenge Yasabye Abanye-Congo Gusigasira Umurage w’Intwari Yarwaniye Uburenganzira n’Umutekano w’Abaturage
Mu rwego rwo kuzirikana no kwibuka Lt. Gen. Rukunda Michel wamamaye ku izina rya Makanika, Bwana Oliver Rumenge Rugeyo, wigeze gutanga kandidatire ku mwanya w’ubudepite ku rwego rw’igihugu muri Teritwari ya Fizi, Intara ya Kivu y’Amajyepfo, yagaragaje akamaro ko gukomeza gusigasira amateka n’umurage by’iyi ntwari yagize uruhare rukomeye mu guharanira uburenganzira n’umutekano by’abaturage b’i Mulenge no mu Burasirazuba bwa Repubulika Iharanira Demokarasi ya Congo bose muri rusange.
Tariki ya 19/02/2025, mu nyandiko yanyujije ku kinyamakuru Minembwe Capital News, Rumenge yatangaje ko uyu munsi uzahora wibukirwa mu mateka nk’umunsi ukomeye ku Banyamulenge by’umwihariko ndetse n’Abanye-Congo muri rusange, kuko ari bwo bibuka iyicwa rya Lt. Gen. Rukunda Michel “Makanika”, wabaye ku isonga mu guharanira ko abaturage bagira uburenganzira busesuye n’umutekano urambye.
Yagaragaje ko uyu munsi ari umwanya wo kwibuka ubwitange bw’intwari yatanze ubuzima bwayo mu bihe by’akaga n’ihohoterwa byibasiraga abaturage bazira inkomoko yabo, aho Lt. Gen. Makanika yabaye ikimenyetso cy’ubudacogora n’umurava mu guharanira ko abaturage babaho mu mutekano, bagahabwa uburenganzira bwabo nk’Abanye-Congo.
Amateka agaragaza ko Rukunda Michel “Makanika” yari umwe mu basirikare bafite ubunararibonye mu bya gisirikare, wagaragaje ubushishozi mu bihe bitandukanye by’imvururu n’intambara byibasiye Akarere k’Ibiyaga Bigari. Yafashe iya mbere mu kurinda abasivili bicwaga, batwikirwaga imitungo ndetse bakanimurwa mu byabo bazira uko bavutse cyangwa uko basa.
Rumenge yakomeje ashimangira ko urupfu rwa Lt. Gen. Makanika rwabaye tariki ya 19/02/2025 rwashenguye imitima ya benshi, cyane cyane Abanyamulenge bamubonagamo umurinzi n’ijwi ryabo mu bihe by’akaga. Yaguye ku rugamba ari kumwe n’izindi ntwari zaharaniye uburenganzira bwa muntu, zishyira imbere amahoro n’ubwiyunge nubwo byasabaga igiciro gikomeye cyo gutanga ubuzima bwazo.
Yasoje ashimangira ko kuva icyo gihe kugeza ubu, Abanyamulenge bakomeje kunyura mu bihe bikomeye birimo ihohoterwa, ivangura n’ibikorwa by’urugomo bikorerwa abaturage bazira uko basa. Gusa ngo ukwibuka Lt. Gen. Makanika ni umwanya wo gusubiza amaso inyuma, hibazwa ku murage yasize wo kudacika intege, kurwanirira uburenganzira bwa muntu no guharanira ko abagore, abana n’abasaza babaho mu mutekano usesuye.
Muri ibi bihe bitoroshye, hakomeje kwihanganishwa imiryango yabuze ababo, cyane cyane Abanyamulenge n’abandi Banyekongo bose babuze intwari zabo. Icyizere kiracyari cyose ko n’ubwo hari imbogamizi zikomeye, urugamba rwo gushaka amahoro arambye, ubutabera n’uburenganzira busesuye ruzagerwaho.
Kwibuka Lt. Gen. Makanika bikomeje kuba isoko y’imbaraga n’icyizere ku bakomeje guharanira ubuzima bw’abaturage, bibutsa ko amaraso y’intwari atameneka ubusa, kandi ko ibyo zitanze bizahora ari umusingi w’urugendo ruganisha ku mahoro arambye n’uburenganzira busesuye kuri bose.
