Papa Léon XIV yashimangiye ko umutekano urambye hagati ya Israel na Palestine ushingiye ku ishingwa rya Leta ya Palestine
Mu rugendo rwe rwerekeza muri Libani avuye muri Turikiya, Papa Léon XIV yongeye gushimangira umwanzuro wa Kiliziya Gatolika ku bijyanye n’amahoro arambye hagati ya Israel n’Abanya-Palestine, avuga ko igisubizo cyonyine cy’iyo ntambara imaze imyaka myinshi ari ugushyiraho Leta yigenga ya Palestine.
Mu kiganiro n’abanyamakuru bari kumwe na we mu ndege, Papa Léon XIV yagize ati:
“Twese turabizi ko kugeza ubu Israel itarashyigikira icyo gisubizo, ariko twebwe turacyagifata nk’inzira yonyine ishoboka.”
Iri jambo ni rimwe mu ryafashwe nk’ay’ubutwari n’ubwiyemezi bwo gukomeza gushimangira amahame ya Kiliziya yo guharanira amahoro, ubumwe n’uburenganzira bw’abaturage bose, hatitawe ku mahame y’amadini cyangwa igihugu bakomokamo.
Vatican isanzwe ifite umwanya udasanzwe mu biganiro by’amahoro ku Isi, aho kenshi yagaragaje ko ishyigikiye ko hubahirizwa uburenganzira bwa buri gihugu n’ubw’abantu bose, by’umwihariko mu Burasirazuba bwo hagati.
Ubutumwa bwa Papa Léon XIV buje mu gihe umutwe wa Hamas na Israel bakomeje intambara ikaze, ikomeje guhitana ubuzima bw’abasivili ku bwinshi no gusenya intambwe zari zaratewe mu nzira y’amahoro.
Mu gusesengura uru ruzinduko, bamwe mu bakurikirana ibya politiki mpuzamahanga basanga amagambo ya Papa ari “intabara y’ubutabera,” agaragaza ko amahoro adashobora kugerwaho binyuze mu gisirikare, ahubwo aboneka biciye mu biganiro n’ukwubahana.
Iri tangazo rya Papa Léon XIV ryiyongera ku magambo nk’aya yavuzwe n’abandi Bapapa bamubanjirije, barimo Papa Jean Paul II na Papa François, bose baharaniraga amahoro arambye mu Burasirazuba bwo hagati.
