Perezida Ndayishimiye mu Magambo Ashaririye Ashinja u Rwanda, Isi Isabwa Gusesengura Ukuri
Mu mvugo zikomeje guteza impungenge ku rwego mpuzamahanga, Perezida w’u Burundi, Evariste Ndayishimiye, yongeye kwijandika mu magambo yuzuyemo ibinyoma karundura, aharabika u Rwanda ku mugaragaro, mu buryo bunyuranyije n’ukuri kwemezwa n’ibimenyetso bifatika. Ibi yabikoze yirengagije ku bushake amateka n’imiterere nyakuri y’ibibazo byo mu karere, anagerageza guhuza umutwe wa RED-Tabara, AFC/M23 n’Ingabo z’u Rwanda, ibintu bikunze kwamaganirwa kure n’abakurikirana ibibazo by’umutekano wo mu karere.
Iyi mvugo ya Perezida Ndayishimiye igaragara nk’igikorwa kigamije guhisha ukuri no kugoreka isura y’u Rwanda ku ruhando mpuzamahanga, mu gihe ibibazo by’umutekano muke mu burasirazuba bwa Repubulika Iharanira Demokarasi ya Congo (RDC) bifite imizi izwi kandi isobanutse, yagiye isesengurwa n’imiryango mpuzamahanga n’impuguke zikurikiranira hafi ibibazo by’akarere k’Ibiyaga Bigari.
By’umwihariko, Perezida w’u Burundi yirengagije ku bushake ubufatanye buzwi hagati y’ubutegetsi bwe, ingabo ze, Imbonerakure, ingabo za RDC (FARDC) n’imitwe yitwaje intwaro irimo FDLR, umutwe ugizwe n’abagize uruhare muri Jenoside yakorewe Abatutsi mu 1994. Uyu mutwe umaze igihe uhabwa uburenganzira bwo gukorera no kwinjizwa mu nzego za gisirikare za RDC n’iz’u Burundi. Iyi mikoranire imaze kugaragazwa inshuro nyinshi n’impuguke mu by’umutekano, kandi ikomeje kuba imwe mu mpamvu nyamukuru zituma intambara n’ubwicanyi bikorerwa abasivili mu burasirazuba bwa Congo bikomeza gufata indi ntera.
Ndayishimiye yagerageje gushinja u Rwanda mu buryo bugaragara nk’amayeri ya politiki agamije kuyobya uburari, aho ibihugu bimwe bihitamo gushinja amahanga aho kwirengera inshingano bifite mu gukemura ibibazo by’umutekano muke n’ubwiyunge bw’abaturage. Ibi kandi bigaragaza icyuho gikomeye mu kubahiriza amahame mpuzamahanga agenga imikoranire y’ibihugu, by’umwihariko ihame ryo kutabangamira umutekano w’igihugu cy’abaturanyi.
Mu gihe amahanga akomeje gushishikariza inzira y’ibiganiro, ubwumvikane n’ubufatanye bushingiye ku kuri n’isesengura ridaheza, amagambo yuzuye ibinyoma n’ibirego bidafite ishingiro akomeje kubangamira iyo nzira, anongera umwuka mubi mu karere kamaze imyaka myinshi kabangamiwe n’intambara n’ingaruka zayo zikomeye.
Ni muri urwo rwego Isi isabwa kudapfukirana ukuri, ahubwo igashingira ku bimenyetso bifatika n’isesengura ryimbitse, kugira ngo amajwi aharabika igihugu kimwe atabangamira umuhate rusange wo kugarura amahoro arambye n’umutekano usesuye mu karere k’Ibiyaga Bigari.