Perezida Ndayishimiye na Tshisekedi berekeje mu Burusiya: Dore ikibajyanye

Minembwe Capital News (MCN)

Perezida w’u Burundi, Évariste Ndayishimiye, na Perezida wa Repubulika Iharanira Demokarasi ya Congo (RDC), Félix-Antoine Tshisekedi, berekeje i Moscow mu Burusiya, aho bitabiriye Inama ya Gatatu ihuza u Burusiya n’ibihugu bya Afurika, iteganyijwe gutangira kuri uyu wa Gatatu, igakomeza no ku wa Kane, tariki ya 29/10/2026.

Ibiro by’Umukuru w’Igihugu cy’u Burundi byatangaje ko Ndayishimiye yahagurutse mu Burundi ku munsi w’ejo, tariki ya 27/10/2026, aherekejwe n’umugore we, Angeline Ndayishimiye. Biteganyijwe ko agira uruhare mu kuyobora ibikorwa by’iyi nama, mu gihe ayoboye Umuryango wa Afurika Yunze Ubumwe (AU).

Ku ruhande rwa RDC, Ibiro bya Perezida byatangaje ko Tshisekedi yageze i Moscow ku munsi w’ejo, tariki ya 27/10/2026. Urugendo rwe rugamije kwagura ubufatanye mpuzamahanga bwa RDC no gushimangira umubano wayo n’u Burusiya.

Mu ruzinduko rwe, Tshisekedi ateganyijwe kugirana ibiganiro na Perezida w’u Burusiya, Vladimir Putin, mu Ngoro ya Kremlin. Hateganyijwe kandi gusinywa amasezerano y’ubufatanye mu nzego z’ubuzima, ubucuruzi, ubushakashatsi mu bya siyansi n’ikoranabuhanga. Byongeye kandi, biteganyijwe ko urubyiruko rwa Congo ruzahugurwa binyuze muri gahunda ya Alabuga Start.

Iyi nama igamije gushimangira ubufatanye hagati y’u Burusiya n’ibihugu bya Afurika mu bya politiki, ubukungu, ubucuruzi, dipolomasi n’ikoranabuhanga.

Minembwe Capital News (MCN)