Perezida Trump na Netanyahu Bageze ku Cyemezo Gikomeye: Amerika Igiye Guhagarika Inkunga Yahaga Israel
Minembwe Capital News (MCN)
Perezida wa Leta Zunze Ubumwe za Amerika, Donald Trump, yatangaje ko yumvikanye na Minisitiri w’Intebe wa Israel, Benjamin Netanyahu, ko Amerika izahagarika inkunga y’amafaranga yahaga Israel buri mwaka, guhera mu mpera za 2026. Icyakora, yavuze ko Amerika izakomeza kuyifasha igihe izaba ibikeneye.
Trump yabigarutseho mu kiganiro yagiranye na televiziyo ya Fox News, muri gahunda ya Fox & Friends, aho yasobanuye ko we na Netanyahu bamaze kumvikana kuri gahunda yo guhagarika iyo nkunga.
Yagize ati: “Ku bijyanye no guha Israel amafaranga, Netanyahu nanjye twagiranye amasezerano yo kuyifasha n’amafaranga angana na miliyari 4 z’amadolari buri mwaka, ariko mu mezi ashize twumvikanye ko tuzabihagarika. Twamaze kwemeranya ko mu mpera z’uyu mwaka tutazongera guha Israel ayo mafaranga. Ariko tuzakomeza kuyifasha igihe izaba ibikeneye.”
Nubwo Trump atagaragaje neza ubwoko bw’inkunga yavugaga ko izahagarikwa, yasobanuye ko kimwe mu byatumye afata iki cyemezo ari ukunanirwa kwihanganira kunengwa gukomeje kugaragara muri politiki y’imbere muri Amerika, bijyanye n’inkunga igihugu cye giha Israel.
Yatanze urugero rwa Abdul El-Sayed, umukandida ushaka kujya muri Sena ahagarariye leta ya Michigan, ukunze kunenga inkunga Amerika iha Israel.
Trump yagize ati: “Kuki twakomeza kwihanganira kunengwa n’abantu nka El-Sayed kandi Israel itagikeneye iyo nkunga? Ibyo byakomeje kuba ingingo ikoreshwa mu kutunenga.”
Yongeyeho ko igitekerezo cyo guhagarika iyo nkunga cyaturutse kuri Netanyahu ubwe, wavuze ko Israel itagikwiye gukomeza kuyihabwa, kuko ari imwe mu ngingo zikunze gukoreshwa mu kunenga Amerika.
Impamvu Amerika ishobora guhagarika inkunga yahaga Israel
Iyi gahunda ije mu gihe inkunga ya gisirikare Amerika iha Israel imaze kuba imwe mu ngingo zikomeye zitera impaka muri politiki y’Amerika, haba mu Ishyaka ry’Aba-Demokarate ndetse no mu Ishyaka ry’Aba-Republicains.
Kuva Israel yatangira ibikorwa bya gisirikare mu kwezi kwa gatanu mu 2023, umubare w’Abanyamerika bashyigikira Israel wagabanutse, cyane cyane mu bagize Ishyaka ry’Aba-Demokarate. Bamwe mu banyapolitiki n’abaturage bagiye bagaragaza ko Amerika ikwiye kongera gusuzuma inkunga iha Israel, bitewe n’ingaruka z’intambara yo muri Gaza.
Ubushakashatsi bwakozwe na Kaminuza ya Quinnipiac mu kwezi kwa gatandatu, bwagaragaje ko 48% by’Abanyamerika bitabiriye ubwo bushakashatsi na 66% by’abagize Ishyaka ry’Aba-Demokarate batekereza ko Amerika ishyigikira Israel birenze urugero.
Iyi mibare yariyongereye ugereranyije n’ubushakashatsi bwo mu 2017, aho yari kuri 16% ku Banyamerika muri rusange na 20% ku bagize Ishyaka ry’Aba-Demokarate.
Ingano y’inkunga Amerika isanzwe iha Israel
Ubusanzwe, Amerika igenera Israel inkunga ya gisirikare ingana na miliyari 3,8 z’amadolari buri mwaka. Muri ayo mafaranga, miliyari 3,3 z’amadolari agenewe kugura ibikoresho bya gisirikare, mu gihe miliyoni 500 z’amadolari zikoreshwa mu gushyigikira gahunda zo kwirinda ibitero.
Amasezerano agenga iyo nkunga ateganyijwe kurangira mu 2028. Uretse iyo nkunga isanzwe, mu 2024 Amerika yemeje n’inkunga y’inyongera yihutirwa, bituma amafaranga yose yari yemerewe guha Israel muri uwo mwaka agera kuri miliyari 12,5 z’amadolari, harimo n’ayemejwe n’Inteko Ishinga Amategeko.
Icyakora, gahunda yatangajwe na Trump ntiraremezwa n’inzego z’impande bireba. Minisiteri y’Ububanyi n’Amahanga ya Amerika, iya Israel ndetse n’Ibiro bya Minisitiri w’Intebe Benjamin Netanyahu ntibari bagira icyo batangaza cyemeza ayo makuru.
Bityo, nubwo Trump yavuze ko yumvikanye na Netanyahu guhagarika iyo nkunga, haracyari ibibazo ku bwoko bw’amafaranga azahagarikwa n’uburyo icyo cyemezo kizashyirwa mu bikorwa, cyane ko amasezerano asanzwe agenga inkunga ya gisirikare ateganyijwe kugeza mu 2028.
Minembwe Capital News (MCN)