Perezida Tshisekedi Agiye Gusbira i Luanda muri Angola
Nyuma y’uruzinduko yagiriye mu mujyi wa Kananga, Perezida wa Repubulika Iharanira Demokarasi ya Congo (RDC), Félix Antoine Tshisekedi Tshilombo, ategerejwe i Luanda muri Angola, mu ruzinduko rwa kane mu minsi mike ishize, rugamije gukomeza gushyira imbaraga mu gitekerezo cy’imishyikirano iganisha ku mahoro arambye.
Amakuru aturuka mu nzego zitandukanye agaragaza ko Perezida Tshisekedi ari mu bihe bikomeye bya dipolomasi, aho agenda ahura n’igitutu gikomeye kimusaba kwemera inzira y’ibiganiro. Mu nama mpuzamahanga yabereye i Davos, abahagarariye u Bubiligi bamugaragarije ko kuganira n’impande zose bireba ari ingenzi kandi byihutirwa. Ubu butumwa bwasubiwemo no mu biganiro aheruka kugirana na Perezida w’u Bufaransa, Emmanuel Macron, i Paris mu Bufaransa.
Muri icyo gihe, indi ntambwe ikomeye yafashwe n’uko intumwa z’ihuriro AFC/M23, ziyobowe na Bertrand Bisimwa, ziteganya kuva mu mujyi wa Goma zikerekeza i Doha muri Qatar, aho biteganyijwe ko hazabera icyiciro cya nyuma cy’imishyikirano.
Nk’uko bitangazwa n’amasoko atandukanye yizewe, iyi nshuro ishobora kuba ari yo ya nyuma y’imishyikirano ikomeye, igomba gufata ibyemezo by’ingenzi ku hazaza h’umutekano mu Burasirazuba bwa RDC. Perezida Tshisekedi, ugaragara nk’uwamaze kugerwaho n’igitutu gikomeye cy’imbere mu gihugu n’icyo ku rwego mpuzamahanga, bivugwa ko yatangiye kugaragaza ubushake bwo kwemera ibisabwa na AFC/M23, by’umwihariko ingamba zo kubaka icyizere zirimo kurekura imfungwa.
Bivugwa ko uru rugendo rwa Tshisekedi i Luanda, ndetse n’imishyikirano iteganyijwe i Doha, bishobora kuba urufunguzo rw’icyerekezo gishya mu gushakira RDC amahoro n’ituze byari bimaze igihe byifuzwa n’abaturage bayo n’umuryango mpuzamahanga.