Qatar na Togo mu Rugendo Rushya rwo Kugarura Amahoro mu Burasirazuba bwa RDC
Mu rwego rwo gushimangira inzira y’ibiganiro bigamije kugarura amahoro arambye mu Burasirazuba bwa Repubulika Iharanira Demokarasi ya Congo (RDC), hateganyijwe koherezwa ubutumire i Kinshasa n’i Goma, hagamijwe gutegura ibiganiro bikurikiraho bizibanda ku masezerano atandatu agamije gukemura imizi y’umutekano muke n’amakimbirane amaze igihe muri ako karere.
Ibi biganiro biteganyijwe kubera i Doha muri Qatar, mu murongo w’ubuhuza mpuzamahanga bukomeje gushyira imbere ibiganiro byimbitse, bifunguye kandi bihuriweho n’impande zose bireba, zirimo Leta ya RDC n’ihuriro AFC/M23.
Ahmed Essa M. H. Al-Sulaiti, uhagarariye Minisitiri w’Igihugu wa Qatar, yagiranye ibiganiro byimbitse na Perezida wa Togo, Faure Essozimna Gnassingbé, byibanze ku ntambwe zikurikiraho mu biganiro hagati ya AFC/M23 na Leta ya Kinshasa. Ibi biganiro byagaragaje ihuriro ry’ibitekerezo hagati ya Togo na Qatar ku buryo bwo gukemura amakimbirane hashingiwe ku biganiro, ubufatanye bw’akarere n’icyubahiro cy’inzego z’Umuryango wa Afurika Yunze Ubumwe (AU).
Qatar imaze kwigaragaza nk’igihugu gifite ubunararibonye mu guhuza impande zishyamiranye binyuze mu biganiro byubaka. Mu Karere k’Ibiyaga Bigari, Doha yakomeje kugaragaza ubushake buhamye bwo gushyigikira amahoro n’umutekano, binyuze mu gufasha inzira zitandukanye z’ubuhuza no gushishikariza impande zose kwinjira mu biganiro bifunguye kandi bidakumira.
Izi mbaraga zishingiye ku cyerekezo cyo gufasha akarere kubona ibisubizo birambye bigamije inyungu rusange z’abaturage bagizweho ingaruka n’intambara n’ubwumvikane buke bumaze igihe.
Mu bwumvikane busesuye n’ubuhuza buyobowe n’Umuryango wa Afurika Yunze Ubumwe, ufite Perezida wa Togo nk’Umuyobozi w’Inama, Qatar yongeye gushimangira ko yiteguye gukorana bya hafi na Lomé mu gushimangira intambwe imaze guterwa mu rugendo rwo kugarura amahoro.
Intego nyamukuru ni ugushaka igisubizo kirambye gishingiye ku bwumvikane no ku nyungu z’abaturage bose bo mu Burasirazuba bwa RDC n’akarere kose k’Ibiyaga Bigari, mu buryo amahoro ataba ay’igihe gito, ahubwo akaba umusingi w’iterambere rirambye n’ubwizerane hagati y’ibihugu.
Iyi diplomasi ihuza Afurika n’Uburasirazuba bwo Hagati igaragaza icyerekezo gishya mu gukemura amakimbirane yo mu karere, aho ubufatanye mpuzamahanga bushingiye ku bwubahane no ku biganiro bifatwa nk’urufunguzo rw’amahoro arambye. Kuba Togo na Qatar bahuriza ku murongo umwe byongera icyizere ko inzira y’ibiganiro izatanga umusaruro ufatika, cyane cyane mu gihe izubahiriza amajwi n’inyungu z’abaturage bagizweho ingaruka n’iyi myivumbagatanyo.
Mu gihe ubutumire i Kinshasa n’i Goma bugitegerejwe, amaso ya benshi arareba i Doha, aho hitezwe ko hazavamo intambwe ikomeye ishobora guhindura amateka y’umutekano mu Burasirazuba bwa RDC no mu Karere k’Ibiyaga Bigari muri rusange.
