RDC Indege za Gisirikare Zitagira Abapilote Zarasiwe ku Kibuga Mpuzamahanga cya Bangboka
Guverinoma y’Intara ya Tshopo yatangaje ko ku Cyumweru, tariki ya 01/03/2026, haburijwemo ibitero by’indege enye za gisirikare zitagira abapilote (drones kamikaze), ivuga ko zari zoherejwe n’ihuriro rya Alliance Fleuve Congo, AFC/M23, zigamije kwibasira Ikibuga Mpuzamahanga cya Bangboka giherereye mu mujyi wa Kisangani, mu burasirazuba bwa Repubulika Iharanira Demokarasi ya Congo. Icyakora, ubuyobozi bwa AFC/M23 ntiburagira icyo bubivugaho.
Mu itangazo ryashyizwe ahagaragara n’ubuyobozi bw’iyo ntara, hagaragajwe ko izi ndege zose zarasiwe mu kirere hifashishijwe uburyo bushya bwo kurinda ikirere (système de défense aérienne) buherutse gushyirwaho mu rwego rwo gukaza umutekano w’ibikorwa remezo bikomeye. Indege ya mbere yarashwe saa cyenda n’iminota 48 (15h48), iya kabiri saa kumi n’imwe n’igice (17h30), iya gatatu saa moya n’igice z’umugoroba (19h30), mu gihe iya nyuma yarashwe saa moya n’iminota 48 (19h48), nk’uko iryo tangazo rikomeza ribivuga.
Ubuyobozi bw’intara bwagaragaje ko, nubwo ibi bitero byageragejwe mu masaha y’akazi kenshi ku kibuga cy’indege, Ingabo za Repubulika Iharanira Demokarasi ya Congo (FARDC), zifatanyije n’abafatanyabikorwa mu by’umutekano, zagaragaje ubunyamwuga n’ubushobozi bwo guhangana n’icyo kibazo, bityo ibikorwa by’ikibuga cy’indege bikomeza nta nkomyi.
Ikibuga Mpuzamahanga cya Bangboka gifatwa nk’ihuriro rikomeye mu bwikorezi bwo mu kirere mu majyaruguru y’igihugu, kikaba kiri mu bilometero bisaga igihumbi uvuye ku mirongo y’imbere y’urugamba mu ntara za Kivu y’Amajyaruguru na Kivu y’Amajyepfo. Kuba cyari kigabweho igitero cy’indege zitagira abapilote bifatwa nk’ikimenyetso cy’ihinduka ry’imiterere y’intambara, aho hiyongeramo ikoreshwa ry’ikoranabuhanga rigezweho mu bikorwa bya gisirikare.
Mu mateka y’Intara ya Tshopo n’umujyi wa Kisangani, umutekano w’uyu mujyi wigeze guhungabanywa kenshi mu bihe by’intambara zo hagati ya 1996–2003, ubwo wagiye ubera isibaniro ry’ingabo zitandukanye zarwaniraga ubutegetsi n’inyungu za politiki n’ubukungu. Icyakora, mu myaka yakurikiyeho, Kisangani yagaragaye nk’akarere gafite ituze ugereranyije n’uburasirazuba bwa RDC bukomeje kurangwamo imirwano.
Guverinoma y’Intara ya Tshopo yahamagariye abaturage gukomeza ituze no kuba maso, ibizeza ko ingabo n’inzego z’umutekano bifite ubushobozi n’ubushake bwo kurinda intara no guhangana n’icyo ari cyo cyose cyahungabanya amahoro n’umutekano by’abaturage.
Ubuyobozi bwashoje bushimangira ko umutekano w’ibikorwa remezo by’ingenzi, birimo ibibuga by’indege, uzahora ushyirwa imbere mu rwego rwo kurinda ubusugire bw’igihugu no gukomeza ibikorwa by’iterambere n’ubuhahirane hagati y’intara n’amahanga.
