RDC: Kudashyira Kivu y’Amajyepfo n’iy’Amajyaruguru muri gahunda y’ingengo y’imari ya 2026 byateje impaka zikomeye
Itangwa ry’umushinga w’itegeko ry’ingengo y’imari ya 2026 mu Nteko Ishinga Amategeko ya Repubulika ya Demokarasi ya Congo ryateje impaka n’impungenge mu Ntara ya Kivu y’Amajyepfo. Anselme Ndjungu, uhagarariye ishyaka “Ensemble pour la République” muri iyo ntara, yagaragaje impungenge z’ukuntu izo ntara zitigeze zigaragara muri iyo ngengo y’imari, haba mu rwego rw’inkomoko y’amafaranga cyangwa mu ikoreshwa ryayo.
Mu ijambo rye rikakaye, Ndjungu yagize ati:
“Birababaje kubona Kivu y’Amajyepfo n’iy’Amajyaruguru zitagaragara muri iyi ngengo y’imari. Ibi bitanga isura yo kwibagirana cyangwa se umugambi wo gusiga inyuma intara zacu. Birasa nk’aho ari uburyo bwo kuzishyira muri gahunda ya balkanisation.”
Yavuze ko ibi bishyira mu majwi ubuyobozi bwa Minisitiri w’Intebe Judith Suminwa, kandi bikanatanga ubutumwa butari bwiza ku cyerekezo cya Perezida Félix Tshisekedi ku mutekano n’iterambere ry’Uburasirazuba.
Yakomeje agira ati: “Ese Kivu y’Amajyepfo n’iy’Amajyaruguru ziracyari mu maboko ya RDC, cyangwa se zaragurishijwe? Niba zaragurishijwe, zagurishijwe na nde?”
