RDC na Misiri Bashimangiye Ubufatanye Bwa Gisirikare: Umushinga Mugari wo Kuvugurura no Kubaka FARDC Ya Kinyamwuga Utangiye Gushyirwa mu Bikorwa
MINEMBWE CAPITAL NEWS (MCN)
Mu rwego rwo gukomeza kuvugurura no kuzamura urwego rw’ubunyamwuga bw’Ingabo za Repubulika Iharanira Demokarasi ya Congo (FARDC), Leta ya Congo ikomeje gushimangira ubufatanye n’Igihugu cya Misiri, kimwe mu bihugu bifite ubunararibonye n’amateka akomeye mu rwego rwa gisirikare ku mugabane wa Afurika.
Ibiganiro byo ku rwego rwo hejuru byabereye i Cairo byahuje abayobozi bakuru b’impande zombi, byibanze ku buryo bwo kongerera FARDC ubushobozi binyuze mu mahugurwa, guhererekanya ubumenyi, kuvugurura amashuri ya gisirikare no guteza imbere ibikorwa bya engineering ya gisirikare, hagamijwe kubaka igisirikare gikora kinyamwuga kandi gifite ubushobozi bwo guhangana n’ibibazo by’umutekano igihugu gihura na byo.
Leta ya Misiri yagaragaje ubushake busesuye bwo gufasha Repubulika Iharanira Demokarasi ya Congo muri uru rugendo rwo kongera ubushobozi bw’ingabo zayo. Abayobozi ba Misiri batangaje ko biteguye gutanga ubufasha mu mahugurwa y’abasirikare, kongerera ubumenyi ofisiye bakuru ba FARDC, ndetse no gusangira ubunararibonye bwabo mu micungire n’imikorere y’igisirikare cya kijyambere.
Muri uru ruzinduko rwabaye kuva ku wa 8 kugeza ku wa 11 Nyakanga 2026, Minisitiri w’Intebe Wungirije wa RDC ushinzwe Ingabo n’Abahoze ku Rugerero, Guy Kabombo Muadiamvita, yasuye ahantu h’ingenzi hagaragaza amateka n’ubutwari bw’Ingabo za Misiri. Muri urwo ruzinduko yashyize indabo ku Mva y’Umusirikare Utazwi (Unknown Soldier Memorial), ahafatwa nk’ahantu h’icyubahiro gikomeye mu gisirikare cya Misiri, mu rwego rwo guha icyubahiro abasirikare bitanze ku bw’igihugu cyabo.
Itsinda ryari riherekeje Minisitiri Guy Kabombo, rigizwe n’abajenerali n’abandi basirikare bakuru ba FARDC, ryanasuye ibigo bitandukanye bya gisirikare bya Misiri, birimo amashuri akomeye atanga amahugurwa ku basirikare, aho barebeye hafi uburyo ayo mashuri akora, ibikoresho bigezweho akoresha ndetse n’uburyo ategura abayobozi b’ingabo.
Minisiteri y’Ingabo ya RDC yatangaje ko uru ruzinduko rugamije gushyira mu bikorwa gahunda ndende yo kuvugurura FARDC, cyane cyane mu rwego rwo kuzamura ireme ry’amahugurwa ahabwa abasirikare no kubaka ibigo byigisha amasomo ya gisirikare bigezweho.
Mu biganiro Guy Kabombo yagiranye na mugenzi we wa Misiri, Lt. Gen. Ashraf Salem Zaher, impande zombi zaganiriye ku nkingi enye z’ingenzi zizashingirwaho ubufatanye bwa gisirikare hagati y’ibihugu byombi. Muri zo harimo kongerera FARDC ubumenyi n’ubushobozi bwa kinyamwuga, kuvugurura ibikorwaremezo by’amashuri ya gisirikare, guteza imbere ibikorwa bya engineering ya gisirikare, ndetse no gukomeza gahunda z’amahugurwa ahoraho ku basirikare ba Congo.
Abagize intumwa za Congo banasuye Ishuri Rikuru rya Gisirikare rya Misiri, rimwe mu mashuri azwi cyane muri Afurika, kugira ngo barebe imikorere yaryo, uburyo ritegura abayobozi b’ingabo ndetse n’ibikoresho byifashishwa mu myitozo. Ku ruhande rwa Congo, basobanuye ko ibyo babonye bishobora kuba icyitegererezo mu mavugurura ateganyijwe mu bigo by’amahugurwa bya FARDC.
Amakuru atangwa na Leta ya Congo agaragaza ko ubu bufatanye bufite intego yo kubaka igisirikare gikomeye, gifite ubumenyi bujyanye n’igihe kandi gishobora kurushaho kurinda ubusugire bw’igihugu.
Ubu butumwa bwa Congo muri Misiri buyobowe na Minisitiri w’Intebe, Judith Suminwa Tuluka, bukaba buri mu rwego rw’uruzinduko rugari rugamije gushimangira umubano wa dipolomasi n’ubufatanye hagati y’ibihugu byombi, by’umwihariko mu rwego rw’umutekano n’igisirikare.
Izi ngamba zije zikurikira uruzinduko ruherutse gukorwa na Perezida Félix Antoine Tshisekedi Tshilombo muri Misiri, aho impande zombi zari zemeranyije kurushaho kwimakaza ubufatanye mu nzego zitandukanye zirimo umutekano, uburezi, ubukungu n’iterambere.
Nubwo ubu bufatanye bushya bushobora kugira uruhare mu kongerera FARDC ubushobozi mu gihe kiri imbere, ababikurikiranira hafi bagaragaza ko kubaka igisirikare cya kinyamwuga bisaba no kuvugurura imiyoborere y’inzego z’umutekano, kongera ubushobozi bw’ibigo by’amahugurwa, no gukomeza ishoramari rirambye mu bikoresho, ikoranabuhanga ndetse no mu myitozo y’abasirikare.
MINEMBWE CAPITAL NEWS (MCN)
