RDC: Perezida Félix Tshisekedi yakiriye Abahuza b’Umuryango wa Afurika Yunze Ubumwe mu Rugendo rwo Gushakira Amahoro Uburasirazuba bw’Igihugu
Ku wa Kane tariki ya 29/01/2026, Perezida wa Repubulika Iharanira Demokarasi ya Congo (RDC), Félix Antoine Tshisekedi Tshilombo, yakiriye i Kinshasa itsinda ry’abahuza b’Umuryango wa Afurika Yunze Ubumwe (UA), mu rwego rwo gushakira umuti urambye ikibazo cy’umutekano muke umaze imyaka myinshi wibasiye Uburasirazuba bw’iki gihugu.
Iryo tsinda rigizwe n’abanyacyubahiro bane bayoboye ibihugu byabo mu bihe bitandukanye, barimo Uhuru Kenyatta wahoze ari Perezida wa Kenya, Olusegun Obasanjo wahoze ari Perezida wa Nigeria, Catherine Samba-Panza wahoze ari Perezida wa Repubulika ya Centrafrique, na Sahle-Work Zewde wahoze ari Perezida wa Ethiopia. Aba bahuza bashinzwe ubutumwa n’Umuryango wa Afurika Yunze Ubumwe, bakaba ari intumwa za Perezida wa Togo, Faure Essozimna Gnassingbé, washinzwe guhuza no gukurikirana ibikorwa bigamije kugarura amahoro mu karere k’Ibiyaga Bigari.
Uru ruzinduko ruri mu murongo w’ibikorwa bya dipolomasi bikomeje gushyirwamo imbaraga n’Umuryango wa Afurika Yunze Ubumwe, bigamije gushaka ibisubizo birambye birimo ibiganiro bya politiki, iby’umutekano n’ubwiyunge, mu rwego rwo guhosha amakimbirane amaze igihe kinini atuma abaturage babarirwa muri za miriyoni bavanwa mu byabo, abandi bagahitanwa n’intambara z’urudaca.
Abahuza b’Umuryango wa Afurika Yunze Ubumwe biteganyijwe ko bazatanga raporo irambuye n’ibitekerezo bifatika mu nama itaha y’uyu muryango, hagamijwe gushyiraho ingamba zifatika zo gukemura ikibazo cy’umutekano muke mu Burasirazuba bwa RDC, aho imirwano ikomeza kuba umunsi ku wundi, nubwo mu myaka yashize hageragejwe imishyikirano n’amasezerano atandukanye.
Uburasirazuba bwa Repubulika Iharanira Demokarasi ya Congo bumaze imyaka irenga makumyabiri bubangamiwe n’intambara zishingiye ku mitwe yitwaje intwaro, amakimbirane ashingiye ku moko, kurwanira umutungo kamere, ndetse n’ingaruka z’amakimbirane yo mu karere. Nubwo Leta ya Congo, ku bufatanye n’imiryango mpuzamahanga, yagiye ishyira mu bikorwa gahunda zitandukanye zo kugarura amahoro, ikibazo cyakomeje gufata indi ntera bitewe n’inyungu zinyuranye z’ababigiramo uruhare.
Kwakira iri tsinda ry’abahuza bifatwa nk’ikimenyetso cy’uko Leta ya RDC ikomeje gushyira imbere inzira za dipolomasi n’ubufatanye mpuzamahanga, aho kwishingikiriza gusa ku gukemura ibibazo hifashishijwe intwaro.
Nyuma y’iki kiganiro cyabereye mu Biro bya Perezida i Kinshasa, habaye ifunguro rya nimugoroba (dîner) rihuza impande zombi, rigamije gukomeza kungurana ibitekerezo. Nyuma yaho, iri tsinda ryahise rikomereza urugendo rwarwo i Kigali mu Rwanda muri uwo mugoroba nyirizina, mu rwego rwo gukomeza ibiganiro n’abandi bafatanyabikorwa bo mu karere.
Ibi bikorwa byose bigaragaza ko ikibazo cy’umutekano muke mu Burasirazuba bwa RDC gikomeje kuba ku isonga mu byihutirwa bya Afurika, ndetse ko amahirwe yo kugarura amahoro arambye ashingiye cyane ku bufatanye bw’ibihugu byo mu karere, ku bushake bwa politiki, no ku ruhare rwimbitse rw’imiryango mpuzamahanga.
