RDC: Raporo nshya ivuga ko abasirikare b’u Burundi bakomerekeye ku rugamba boherezwa kure ku gahato, abapfuye bagashyingurwa mu mashyamba
Amakuru akomeje guturuka mu bice bya Kilungutwe na Kasika mu karere ka Mwenga, mu Ntara ya Kivu y’Amajyepfo, aragaragaza ko abasirikare b’u Burundi bakomerekeye mu mirwano yo muri ibyo bice boherejwe mu mujyi wa Kisangani uri muri teritware ya Walikale, mu Ntara ya Kivu y’Amajyaruguru.
Isoko rituruka mu nzego z’umutekano muri ako gace ryemeza ko aba basirikare “bajyanwe ku gahato,” mu buryo bwafashwe nk’ubugamije kubavuriza kure y’ahabereye imirwano no guhisha amakuru ku mubare w’abakomerekeye ku rugamba.
By’umwihariko, raporo zivuga ko abasirikare b’u Burundi baguye mu mirwano batigeze basubizwa iwabo. Amakuru avuga ko bamwe bashyinguwe mu mashyamba ari mu maboko y’ingabo za Leta, abandi bakajugunywa mu bihuru no ku misozi mu buryo busa no kurindagiza amakuru ku rupfu rwabo.
Abaturage bo muri ibyo bice babwiye itangazamakuru ko bakomeje gusanga imirambo y’ingabo z’u Burundi mu bihuru, bikaba bikomeje kubatera impungenge n’akaduruvayo mu buzima bwabo bwa buri munsi.
Kugeza ubu, nta tangazo na rimwe ryemewe ryatanzwe n’ubuyobozi bwa RDC cyangwa ubw’u Burundi ku birego bikomeje gukwirakwizwa ku mbuga ziganira ku miyoborere n’uburenganzira bwa muntu.
Abasesenguzi ku mutekano n’akarere bavuga ko ibi birego bishya bikomeza kongerera urujijo ku ruhare rw’ingabo z’amahanga mu burasirazuba bwa RDC, akarere kamaze imyaka myinshi karangwa n’intambara, umutekano muke, n’icuraburindi mu kubahirizwa kw’uburenganzira bwa muntu.
Bongeraho ko niba ibi byemejwe n’impande bireba, byaba ari ikimenyetso cy’ubusumbane no kudaha agaciro ubuzima bw’abasirikare boherejwe ku rugamba mu butumwa bwo gufasha RDC, ndetse bigashyira igitutu kuri guverinoma zombi gusobanura uko imirwano iyobowe n’uko imibereho y’ingabo icunzwe.