Sudan y’Epfo yavuze aho visi perezida afungiwe n’icyo imuziza, ndetse na Uganda igira icyo ivuga kubyo ishinjwa.
Abategetsi ba Sudan y’Epfo batangaje ko Riek Machar afungiwe mu rugo iwe, kandi ko bumushinja gushyinga umutwe witwaje intwaro ugamije guhirika ubutegetsi bwa perezida Salva Kiir.
Byatangajwe na minisitiri ushinzwe itumanaho, Michael Makuei, aho yavuze ko iperereza ry’igisirikare cy’iki gihugu ryagaragaje ko Machar yari ari kwegeranya abarwanyi ba SPLA-IO ngo bateze imvururu mu gihugu.
Yagize ati: “Amakuru y’ubutasi n’umutekano agaragaza ko Dr. Riek Machar, yavuganaga n’abayobozi ba politiki n’igisirikare cya SPLM/A-IO abakangurira kugumukana Leta ngo bahungabanye umutekano kugira ngo amatora atabaho ahubwo Sudan y’Epfo isubire mu ntambara.”
Biteganyijwe ko amatora azaba mu kwezi kwa cumi nabiri umwaka wa 2026 ari nayo azaba abaye aya mbere y’umukuru w’igihugu muri iki gihugu cyavutse mu 2011.
Minisitiri w’itumanaho wa Sudan y’Epfo Micheal yashinje kandi Machar kuba inyuma y’ibitero byagabwe n’umutwe wa White Army bigasiga bihitanye abasirikare ba Leta barimo komanda Majur Dak.
Ikindi kandi ashinjwa ni uko tariki ya 25/03/2025 yayoboye ingabo za SPLM/A-IO zinasanzwe mu ngabo za Leta kugaba ibitero kuri bagenzi babo b’ingabo za Sudan y’Epfo banaherewe hamwe imyitozo, bakoherezwa i Tonga, Nyaluak, Wunkur, Whthlel na Rajah.
Ku rundi ruhande, Ingabo za Uganda zirwanira mu kirere ziri muri iki gihugu cya Sudan y’Epfo zirashijwa gutera ibisasu by’ubumara ku birindiro by’uyu mutwe wa White Army muri Leta ya Upper Nile na Jonglei, mu majyaguru y’iki gihugu.
Izi nyeshyamba zimaze iminsi zirwanira n’ingabo za Leta mu bice byaha mu majyaguru zishyigikiwe n’uyu visi perezida Machar Riek uheruka gutabwa muri yombi.
Kimwecyo Uganda ibinyujije mu muvugizi wayo, yahakanye aya makuru ashinja ingabo zayo gutera ibisasu by’ubumara muri ibyo birindiro by’uyu mutwe White Army.
Yagize ati: “Ibivugwa ko ingabo zacyu zakoresheje intwaro z’ubumara, sibyo!”
Avuga ko ibitero izi ngabo zikora biri kw’ibasira ahari ibirindiro birimo abasirikare gusa.
Maze Uganda isaba abakoresha imbuga nkoranyambaga kwirinda guha agaciro ibivugwa ku ngabo zayo; ishimangira ko kuba iri muri Sudan y’Epfo ari uko yabanje kubihererwa uruhushya na Leta y’iki gihugu.
Ubundi kandi ivuga ko ibiri gushinjwa ingabo zayo ari icengezamatwara ry’ifashisha ubwenge bw’ubukorano rigamije kurwanya kuba UPDF iri muri Sudan y’Epfo riri gukorwa na Dr. Riek Machar n’abambari be.
Uyu mugabo Riek Machar asanzwe ari visi perezida wa mbere wa Sudan y’Epfo yafungiwe mu rugo iwe ku ya 26/03/2025, ashinjwa kujya inyuma y’uyu mutwe wa white Army.
