U Bufaransa: Abagabo Barenga Babiri Bakomoka muri Congo Bishwe mu Minsi Itanu Gusa, Havuka Impungenge z’Ivangura
Minembwe Capital News (MCN)
Mu Bufaransa hagaragaye impungenge zikomeye zishingiye ku ivangura rishingiye ku ibara ry’uruhu n’inkomoko y’abantu, nyuma y’uko abagabo batatu bakomoka muri Repubulika Iharanira Demokarasi ya Congo na Angola bahitanywe n’ibikorwa by’urugomo mu gihe cy’iminsi itanu gusa.
Amakuru yatangajwe agaragaza ko aba bagabo bishwe hagati ya tariki ya 23 na 27/10/2026, mu bihe bitandukanye no mu bice bitandukanye by’u Bufaransa.
Uwa mbere ni Pengo Bossio Wangi, ufite imyaka 26, ukomoka muri Repubulika Iharanira Demokarasi ya Congo. Yishwe tariki ya 23/10/2026 mu gace ka Trappes. Amakuru avuga ko yishwe mu gitero gikekwa kuba cyari gifite isura y’ivangura rishingiye ku ibara ry’uruhu cyangwa ku nkomoko ye.
Uwa kabiri ni José Capela, w’imyaka 60, na we ukomoka muri Congo. Yitabye Imana tariki ya 26/10/2026, nyuma yo gukorerwa igitero cy’urugomo mu mujyi wa Saint-Gaudens. Umuryango we urasaba ko ukuri ku rupfu rwe kumenyekana kandi ubutabera bugatangwa.
Uwa gatatu ni Mauricio K., w’imyaka 44, ukomoka muri Angola. Yitabye Imana tariki ya 27/10/2026, ubwo yari afungiwe kuri sitasiyo ya Polisi ya Saint-Ouen. Abagize umuryango we basabye ko hakorwa iperereza ryimbitse kugira ngo hamenyekane neza icyateye urupfu rwe n’imiterere yarwo.
Izi mpfu zongeye guteza impaka n’impungenge ku kibazo cy’ivangura n’ihohoterwa rikorerwa abantu bafite inkomoko mu mahanga, cyane cyane abirabura, mu Bufaransa.
Ibi bibaye mu gihe hakomeje kugaragara impungenge z’uko amagambo amwe n’amwe akoreshwa mu biganiro bya politiki no mu itangazamakuru agamije kwamagana abimukira ashobora gukomeza gukwirakwiza imyumvire yo guheza no guha akato abantu hashingiwe ku nkomoko yabo.
Nubwo impamvu n’imiterere ya buri rupfu bigikeneye gukorwaho iperereza ryihariye kugira ngo ukuri kumenyekane, ibi byabaye byongeye kugarura mu ruhame ikibazo cy’uko umutekano, uburenganzira n’uburinganire bw’abantu bose byubahirizwa mu Bufaransa, hatitawe ku ibara ry’uruhu cyangwa inkomoko yabo.
Minembwe Capital News (MCN)