U Burusiya bwabuze umujenerali ukomeye.
General Igor Kirillov w’Umurusiya yishwe n’igisasu cyaturikiye mu murwa mukuru w’i Moscow.
Ku wa kabiri tariki ya 17/12/2024 ni bwo ikibombe cyahitanye ubuzima bw’umusirikare wari ukomeye wo mu ngabo z’u Burusiya.
Ni amakuru yatangajwe bwa mbere na Leta y’u Burusiya aho yavuze ko uyu musirikare ufite ipeti rya Jenerali yapfuye ku wa kabiri kandi ko yaguye ku muhanda mukuru w’umurwa mukuru, Moscow. Iki gisasu cya nishe n’abandi bantu babiri.
Leta yavuze ko uyu mujenerali wahitanywe n’icyo kibombe yari ashinzwe intwaro za nikereyeri.
Icyo kibombe cyaturitse mu gihe Jenerali Igor Kirillov na vice we bari bavuye gusura inyubako zikorerwamo ibikorwa byagisirikare ziherereye mu majyepfo ashyira uburasirazuba bw’umurwa mu kuru w’u Burusiya.
Nk’uko abayobozi b’u Burusiya babisobanuye n’uko icyo gisasu cyaturitse cyari gihishe mu ipini ya moto yari iparitse mu mwinjuro w’iyo nyubako.
Ubwo cyaturikaga, cyamenaguye ibirahuri bya madirisha gitumura n’urwotsi rutumbagira mu kirere.
Jenerali Igor Kirillov wapfuye yari aheruka gushinjwa na Ukraine kuba itsinda ry’Ingabo yari ayoboye barakoresheje intwaro z’ubumara mu ntambara mu myaka itatu imaze muri Ukraine.
Ni mu gihe kandi mu kwezi kwa Cumi uyu mwaka, u Bwongereza bwari bwa mufatiye ibihano bikakaye, bivuye ku kuba yarakoresheje intwaro z’ubumara mu ntambara igihugu cye kirimo muri Ukraine.
