U Burusiya Bwerekanye Igikorwa cyo Kohereza Misile za Oreshnik za Rutura muri Belarus, Intwaro Ikaze cyane

U Burusiya Bwerekanye Igikorwa cyo Kohereza Misile za Oreshnik za Rutura muri Belarus, Intwaro Ikaze cyane

U Burusiya bwashyize ahagaragara amashusho agaragaza ishyirwa mu bikorwa rya sisiteme ya misile za Oreshnik, zifite ubushobozi bwo gutwara intwaro kirimbuzi (nucléaire) kandi zigendera ku muvuduko wa hypersonique, mu gihugu cya Belarus, gifatwa nk’umufatanyabikorwa wa hafi wa Kremlin.

Nk’uko byatangajwe n’abategetsi b’i Moscou, izi misile zoherejwe muri Belarus mu rwego rwo kongerera u Burusiya ubushobozi bwo kugaba ibitero byihuse ku ntego ziri ku mugabane w’u Burayi, mu gihe habaye intambara cyangwa ubushyamirane bukomeye.

Misile za Oreshnik zifite ubushobozi bwo kugenda ku muvuduko urenze inshuro eshanu umuvuduko w’ijwi, bigatuma zifatwa nk’imwe mu ntwaro zigezweho cyane kandi zitoroshye kuburizwamo n’ubwirinzi bwa gisirikare busanzwe.

Abasesenguzi mpuzamahanga babona iki gikorwa nk’ikimenyetso cyo kongera igitutu ku bihugu bigize NATO, cyane cyane ibiri mu burasirazuba bw’u Burayi, kikaba n’ubutumwa bwa politiki n’ubwerekana imbaraga za gisirikare mu gihe intambara yo muri Ukraine igikomeje.

Moscou ivuga ko ishyirwa ry’izi ntwaro rigamije “gukumira uwo ari we wese washaka guhungabanya umutekano w’u Burusiya n’abafatanyabikorwa babwo.” Gusa, amahanga, arimo Leta Zunze Ubumwe za Amerika n’u Bwongereza, yagaragaje impungenge z’uko iki gikorwa gishobora kurushaho gukongeza ubushyamirane mu karere.

Belarus ikomeje gufatwa nk’inkingi ya politiki n’igisirikare y’u Burusiya muri ako karere, ikaba yarabaye inzira y’ingenzi y’ibikorwa bya gisirikare bya Kremlin kuva intambara yo muri Ukraine yatangira mu 2022. Iyi gahunda nshya yo kohereza intwaro zishobora gutwara ibisasu kirimbuzi yongera gutiza umurindi impungenge z’intambara ishobora kwaguka ku mugabane w’u Burayi.