U Butaliyani Bwataye muri Yombi Abantu 9 Bakekwaho Gutera Inkunga Hamas binyuze mu Muryango w’Abagiraneza
Ubushinjacyaha bw’u Butaliyani bwatangaje ko bwafashe abantu icyenda (9) bakekwaho kugira uruhare mu gutera inkunga umutwe wa Hamas, binyuze mu bikorwa byitwikiriye izina ry’ubugiraneza, byakorerwaga n’amashyirahamwe afite icyicaro mu Butaliyani.
Iyi operasiyo yakozwe ku bufatanye bw’inzego zihariye zirwanya iterabwoba n’izirwanya ibyaha bya Mafia, aho aba bantu bashinjwa icyaha cyo “kugira uruhare no gutera inkunga” Hamas — umutwe wa politiki n’igisirikare wo muri Palestine, wemejwe n’Umuryango w’Ubumwe bw’u Burayi (EU) nk’umutwe w’iterabwoba.
Nk’uko byatangajwe n’ubushinjacyaha, amafaranga agera kuri miliyoni 8.24 z’amadolari ya Amerika yakusanyijwe mu gihe cy’imyaka ibiri ishize, bivugwa ko yari agamije ibikorwa by’ubutabazi, yaje kuyoborwa ku mashyirahamwe n’abantu bafite aho bahurira n’uyu mutwe wa Hamas.
Abakekwa bafatiwe mu bice bitandukanye by’igihugu cy’u Butaliyani, bamwe muri bo bakaba bari bihishe inyuma y’imiryango itanga ubufasha, bayikoresha nk’inzira yo gukusanya no kohereza amafaranga mu buryo bunyuranyije n’amategeko.
Iki kibazo kigaragaza uburyo imitwe y’iterabwoba ikomeje gushaka amayeri mashya yo kubona inkunga, yihisha mu bikorwa by’ubutabazi bigaragara nk’ibifite intego nziza. Abayobozi b’u Butaliyani batangaje ko iperereza rigikomeje, kandi ko hari amahirwe y’uko hagaragazwa abandi bantu bagize uruhare muri uru rubuga mpuzamahanga rw’imari rufasha imitwe y’iterabwoba.
Iki cyemezo cyafashwe n’ubutabera bw’u Butaliyani gishimangira ubushake bw’iki gihugu mu kurwanya iterabwoba, cyane cyane rihishira inyuma y’ibikorwa by’impuhwe n’ubugiraneza.
