Ubuhamya Bw’Umusore w’ i Goma Bushobora Guhindura Imyumvire ya Washington ku Biri Kuba mu Burasirazuba bwa RDC
Ubuhamya butangaje bwatanzwe n’umwe mu rubyiruko rwitabiriye imyigaragambyo yabereye mu mujyi wa Goma bushobora kongera gukurura amaso y’amahanga, by’umwihariko Leta Zunze Ubumwe za Amerika, ku miterere nyayo y’ubuzima mu duce tumwe na tumwe two mu burasirazuba bwa Repubulika ya Demokarasi ya Congo.
Uyu musore, wagize uruhare mu myigaragambyo yakurikiye amakuru yavugaga ko AFC/M23 ishobora kuva mu nkengero z’umujyi wa Uvira, yatanze ubuhamya ku gicamunsi cyo kuri uyu wa Mbere tariki ya 22/12/2025, abinyujije mu majwi yahaye itangazamakuru. Yasobanuye ko impamvu nyamukuru y’iyo myigaragambyo ari ugushaka gutanga ishusho itandukanye n’amakuru, nk’uko abivuga, akenshi agera ku mahanga atagaragaza uko abaturage babayeho ku rwego rwa buri munsi.
Yagize ati: “Twitabiriye imyigaragambyo tugamije kumenyesha amahanga ko hari itandukaniro rikomeye hagati y’ibivugwa n’ukuri tubayemo. Ubuzima turi kubamo muri utu duce twabohowe bwahindutse ku buryo bugaragara, kandi ntibwagereranywa n’igihe twari tukiri mu maboko ya Leta.”
Uyu muturage yakomeje ashimangira ko umutekano n’ubwisanzure mu ngendo n’ikorwa ry’imirimo byiyongereye ku buryo bugaragara, ibintu avuga ko bitari bisanzwe mu gihe utu duce twari tuyobowe n’ingabo za FARDC.
Yagize ati: “Mbere twari mu kavuyo karimo umutekano muke, ubucuruzi budafite icyizere n’inzira zifunze. Ubu abantu baragenda, baracuruza, barakora, ubuzima bwasubiye ku murongo.”
Yagaragaje kandi impungenge n’agahinda byatewe n’amakuru avuga ko AFC/M23 ishobora kuva hafi y’umujyi wa Uvira, abifata nk’icyemezo gishobora gusubiza inyuma intambwe abaturage bumva ko bamaze gutera.
Yagize ati: “Twaje kubwira amahanga ko, ku baturage benshi, M23 ifatwa nk’inyungu yabo. Kuva kwayo hafi ya Uvira byasobanura gusubira inyuma mu bijyanye n’amahoro n’iterambere. Turamagana uwo mwanzuro, tunasaba ko ijwi ry’abaturage bo ku rwego rwo hasi ryitabwaho.”
Ubu buhamya bw’uyu musore wo mu mujyi wa Goma bwongeye kugaragaza ishusho y’ukuri gushingiye ku mibereho ya buri munsi y’abaturage bo mu burasirazuba bwa RDC—ukuri akenshi kutagera ku rwego mpuzamahanga—ariko gushobora kugira uruhare mu guhindura imyumvire n’ibyemezo bifatirwa hejuru ku bijyanye n’iki kibazo gikomeje guteza impaka.
