Uganda: Mu matora ya Chairman wa Kabazana yabayemo akaduruvayo, polisi irahagoboka

Uganda: Mu matora ya Chairman wa Kabazana yabayemo akaduruvayo, polisi irahagoboka

Mu matora y’abayobozi b’impunzi yabereye muri Zone ya Kabazana B, iri mu nkambi ya Nakivale mu majyepfo ya Uganda, habereye imvururu zatumye Polisi y’iki gihugu yinjira mu bikorwa byo kugarura ituze.

Aya matora yabaye ku wa kabiri tariki ya 18/11/2025, aho hiyamamaje abakandida batatu: Bizimana, Suzuki Rasita na Shimiyumukiza Posiana, ari na we waje gutorwa nka Chairman mushya.

Umwe mu mpunzi witabiriye amatora yabwiye Minembwe Capital News ko ibibazo byatangiye nyuma y’itangazwa ry’amajwi, ubwo bamwe mu batari bashyigikiye Posiana batangiye kwigaragambya, bafata amabuye n’ibiti mu kwerekana ko batishimiye umusaruro w’amatora.

Inzego zari zishinzwe gukurikirana amatora zahise zisaba Polisi gukumira urwo rwuka rw’imvururu. Abapolisi bageze ahabereye amatora bahosha vuba ibyo bibazo, bituma ibintu bisubira mu buryo nta wubikomekeyemo.

Ayo matora yabereye no mu bindi bice bitandukanye bya Nakivale, aho impunzi zigira ubuyobozi bwazo. Mandat y’umuyobozi (Chairman) imara imyaka ibiri.

Subiranamo uri mu bitabiriye amatora yagize ati:

“Imvururu zatangiye hashize akanya gato batangaje uwatsinze. Hari abantu batangiye kwitotombera ibyavuye mu matora, bamwe bafata ibiti n’amabuye, bigaragara ko ibintu bishobora gukura.”

Undi mutangabuhamya yagize ati:

“Polisi yahise ihagera yihuta. Badusabye gutuza, kandi ibintu byahise bisubira mu mucyo. Nta muntu wakomerekejwe kuko umutekano wahise usubirana.”

Umwe mu bari mu itsinda ryakurikiraga amatora we yagize ati:

“Uretse ako kaduruvayo kabaye mu gihe cy’itangazwa ry’amajwi, amatora muri rusange yagenze neza. Abaturage bitabiriye ari benshi, kandi uko bisanzwe amatora ahora azana amarangamutima menshi.”