Umusirikare mukuru wari mu babangamiye Abanyamulenge, yarapfuye.
Colonel Jean Pierre Lwamba, umusirikare wo mu ngabo za Repubulika ya demokarasi ya Congo, akaba ari we wari uyoboye brigade ya 21 ifite icyicaro gikuru mu Minembwe ahatuwe n’Abanyamulenge babarirwa mu bihumbi amagana, yarapfuye.
Ku Cyumweru tariki ya 26/01/2025, ni bwo Col. Lwamba yavuyemo umwuka w’abazima aho yishwe n’indwara y’umutima, nk’uko amakuru abivuga.
Ahagana mu ntangiriro z’uku kwezi turimo ni bwo Lwamba yavanywe mu Minembwe, amanukanwa Uvira kugira ngo avurwe.
Hari amakuru yo ku ruhande Minembwe.com ikesha abasirikare bo muri brigade ya 21, batashatse ko amazina yabo aja hanze, bavuga ko uyu musirikare yahawe isumu kandi ko ari yo imuhitanye.
Nanone kandi byavuzwe ko uyu musirikare yari arwaye umutima, ndetse ko yageze Uvira abanza gusa n’uworohewe, aho yarimo avurirwa mu bitaro bikuru bya Uvira muri Kivu y’Amajy’epfo.
Uyu musirikare wari ukuriye brigade ya 21, ni we musirikare wabaye mubi cyane muri aka karere ka Minembwe, nyuma yundi nawe wishe cyane Abanyamulenge witwa Col.Katembo akaba nawe yarayoboye mu Minembwe hagati mu myaka ya 2017 na 2019.
Col. Lwamba, abasirikare yari ayoboye bo muri iyi brigade ya 21 ikiri mu Minembwe, bagiye bagaba ibitero mu bihe bitandukanye, kandi bakabigaba mu mihana ituwe gusa n’Abanyamulenge.
Ibitero bagabye mu Banyamulenge byasize bihitanye abatari bake. Babigabye tariki ya 26,27 na 28 z’u kwezi kwa Cumi nabiri umwaka ushize wa 2024.
Ni ibitero byagabye mu muhana w’i Lundu, Lwiko, ku Runundu no mu Kalingi.
Ikindi Minembwe.com yamenye n’uko Col.Lwamba yarangije igihe c’isaha ya saa saba z’ijoro ryo ku Cyumweru.
Akaba yararangije mu gihe yari yamaze kubona impapuro zimwemerera kuja kwivuriza i Bukavu ku murwa mukuru w’i Ntara ya Kivu y’Amajy’epfo.
