Umutekano n’Isuku Byongeye Kugaruka i Uvira Nyuma y’Ifatwa ry’Umujyi na AFC/M23/MRDP-Twirwaneho
Umuturage wo mu mujyi wa Uvira, mu ntara ya Kivu y’Amajyepfo, yagaragaje ko umutekano n’imibereho myiza byongeye kugaruka nyuma y’uko uwo mujyi ugenzurwa n’ihuriro rya Alliance Fleuve Congo (AFC/M23/MRDP-Twirwaneho).
Mu butumwa yahaye Minembwe Capital News kuri uyu mugoroba wo ku wa Mbere, tariki ya 15/12/2025, uwo muturage yagize ati: “Ubu dufite amahoro menshi kuva Uvira yajya mu maboko ya AFC/M23/MRDP-Twirwaneho.”
Yakomeje ashimangira ko umutekano w’abantu n’ibintu wateye imbere, agaragaza ko ibikorwa by’ubwambuzi byari byarabaye karande byacitse. Ati: “Nta bwambuzi tukibona nk’ubwo Wazalendo badukoreraga. Amasoko arakora neza, abantu baracyuruza nta kibazo.”
Uwo muturage yanavuze ko isuku yo mu mujyi wa Uvira yazamutse ku rwego rutarigeze rubaho mbere. Yagize ati: “Uvira irimo isuku idasanzwe, itarigeze igaragara mu bindi bihe. AFC/M23/MRDP-Twirwaneho si ingabo gusa; mu myitwarire yabo barenze kuba Leta.”
Yongeyeho ko nta baturage bakibona ibibazo byo kwamburwa amafaranga, telefone n’ibindi byabo bwite. Ikindi cyashimangiwe ni uko serivisi z’ibanze zatangiye kongera gutangwa, aho yavuze ko abaturage bamaze gusubizwa umuriro w’amashanyarazi n’amazi, serivisi zari zarahagaritswe ubwo abarwanyi ba Wazalendo, FARDC n’ingabo z’u Burundi bagenzuraga ako gace mbere yuko gafatwa ku itariki ya 09/12/2025 na AFC/M23/MRDP-Twirwaneho.
Ibi byatangajwe n’uyu muturage byerekana ishusho y’uko imibereho y’abaturage ba Uvira iri kugenda ihinduka, mu gihe ubuyobozi bushya bwashyize imbere umutekano, isuku n’ikorwa ry’imirimo iciriritse nk’amasoko n’ubucuruzi.
