Umwuka Mubi n’Ubugizi bwa Nabi Bikomeje Kuvugwa muri Fizi, Abaturage Basaba ubutabazi bwihuse
Amakuru aturuka muri teritwari ya Fizi, mu Ntara ya Kivu y’Amajyepfo, aravuga ko hakomeje kugaragara ibikorwa by’ubugizi bwa nabi bikomoka ku mubano mubi umaze igihe hagati y’imiryango y’Ababembe n’Abapfulero. Aya makuru agaragaza ko, nubwo impande zombi zakomeje gushinjanya uruhare mu bwicanyi, hari abahamya bavuga ko Abapfulero ari bo bakomeje kwibasirwa cyane muri iyi minsi.
Umwe mu baturage bo mu bwoko bw’Abapfulero, wavuganye na Minembwe Capital News, yavuze ko abantu benshi bamaze kugwa mu bitero byabereye mu duce dutandukanye twa teritwari ya Fizi, birimo Kwa Nyange, Misisi n’utundi duce twegeranye. Yavuze ko ibyo bikorwa by’ubwicanyi byatewe ahanini n’ingaruka z’imirwano yabaye hagati y’imitwe yitwaje intwaro ifitanye isano n’impande zombi zifitanye amakimbirane.
Nk’uko ayo makuru abivuga, iyo mirwano yahuje abarwanyi bayobowe na Ngomanzito, ukomoka mu bwoko bw’Abapfulero, n’abandi bayobowe na Hamuri Yakutumba, ukomoka mu bwoko bw’Ababembe. Iyo mirwano ngo yabereye hafi ya santere ya Fizi mu mpera z’ukwezi gushize k’umwaka wa 2025, bikavugwa ko yasize ihitanye abantu batari bake ku mpande zombi.
Abakurikirana ibijyanye n’umutekano muri aka gace bemeza ko amakimbirane hagati y’Ababembe n’Abapfulero atari mashya, kuko yagiye agaruka inshuro nyinshi mu bihe bitandukanye. Icyakora, bavuga ko iby’ubu byafashe indi ntera, bikaba bikomeje guteza impungenge zikomeye ku mutekano w’abaturage no ku ituze rusange muri teritwari ya Fizi.
Abaturage basaba inzego zishinzwe umutekano n’iz’ubuyobozi gufata ingamba zihuse kandi zifatika, hagashakishwa igisubizo kirambye gishingiye ku biganiro, kurengera abasivili no gukumira ko aya makimbirane yakomeza gufata indi ntera.