Uvira: Ubwicanyi Bukomeje Kwiyongera, Abaturage Baratabaza!
Minembwe Capital News (MCN)
Umutekano w’abaturage mu mujyi wa Uvira, mu ntara ya Kivu y’Amajyepfo, mu Burasirazuba bwa Repubulika Iharanira Demokarasi ya Congo (RDC), ukomeje guteza impungenge zikomeye. Ibi byongeye kugaragazwa n’urupfu rw’undi musore wakoraga umwuga w’uburobyi, wari uzwi ku izina rya Demunga, warashwe n’abantu bitwaje intwaro mu gace ka Muramvya, ubwo yari agiye ku Kiyaga cya Tanganyika gukora akazi ke ka buri munsi. Nyuma yo gukomereka bikomeye, yaje kwitaba Imana.
Ibi byabaye mu rukerera rwo kuri uyu wa Gatandatu, tariki ya 07/11/2026, ahagana saa kumi z’ijoro (04h00), kuri Avenue Muhungano, muri Quartier Kasenga, mu mujyi wa Uvira.
Amakuru agera kuri Minembwe Capital News (MCN) avuga ko Demunga yari avuye iwe mu rugo yerekeza ku Kiyaga cya Tanganyika, aho yari asanzwe akorera umwuga w’uburobyi. Ageze mu nzira, yahuye n’abantu bitwaje intwaro bivugwa ko ari abo mu mutwe wa Wazalendo, bamwaka agasakoshi gato yari afite.
Hakurikiyeho kutumvikana hagati ye n’abo bantu, maze baramurasa, bamukomeretsa bikomeye, bahita bahunga berekeza ahantu hatazwi.
Nyuma yo kuraswa, Demunga yajyanywe byihuse mu Bitaro Bikuru bya Uvira kugira ngo ahabwe ubuvuzi. Icyakora, amakuru yemejwe n’abo mu muryango we avuga ko yaje kwitaba Imana azize ibikomere yatewe n’amasasu.
Abaturage ba Uvira baratabaza: Nta munsi ushira hatumvikanye amakuru y’uwishwe
Urupfu rwa Demunga rwongeye kugaragaza ikibazo gikomeye cy’umutekano muke ukomeje guhungabanya ubuzima bw’abaturage bo mu mujyi wa Uvira.
Abaturage bavuga ko nta munsi w’ubusa izuba rirenga cyangwa ijoro rigashira hatumvikanye amakuru y’umuntu wishwe, aho abantu bakomeje guhitanwa n’amasasu mu bihe bitandukanye by’umunsi.
Icyakora, abaturage bagaragaza ko abenshi mu bahitanwa n’ibi bikorwa by’urugomo baba barashwe n’abantu bitwaje intwaro, barimo abo mu mitwe ya Wazalendo cyangwa abasirikare ba FARDC.
Nk’uko amakuru aturuka muri ako gace abigaragaza, ibi bikorwa by’urugomo ntibyabaye uyu munsi gusa. No ku wa Gatanu, ku wa Kane, ku wa Gatatu ndetse no mu yindi minsi yabanje, hakomeje kumvikana amakuru y’abantu barashwe, bamwe bagahita bitaba Imana, abandi bagakomereka.
Bamwe mu baturage baganiriye n’itangazamakuru bavuga ko bamaze kurambirwa n’ubwicanyi n’umutekano muke bikomeje kubugariza. Benshi muri bo basigaye bagaragaza icyifuzo cy’uko umutwe wa FRN wagira icyo ukora kugira ngo ubagoboke, ndetse ukaba wafata umujyi wa Uvira.
Aba baturage bavuga ko mu bice bigenzurwa na FRN babona umutekano ubafasha gukora ibikorwa byabo bya buri munsi nta bwoba, ari na byo bituma bamwe muri bo bifuza ko uwo mutwe wagura ibice ugenzura ukagera no mu mujyi wa Uvira.
Icyakora, ibyo ni ibyifuzo by’abaturage bagaragaza ko batakaje icyizere ku mutekano wabo, mu gihe hakomeje kugaragazwa ko hakenewe ingamba zifatika zo guhagarika ubwicanyi no kurinda abasivili.
Umuryango wa nyakwigendera uri mu gahinda
Umuryango wa Demunga uri mu gahinda kenshi nyuma y’urupfu rwe.
Amakuru atangwa n’abo mu muryango we avuga ko ikiriyo kiri kubera mu rugo rwabo, muri Quartier Kasenga, kuri Avenue Muramvya.
Minembwe Capital News (MCN)