Kenyatta yarahiriye kwandika amateka, avuga icyo agiye gukora hagati ya Leta ya Kinshasa na M23.
Ni amakuru yatangajwe n’umunyamabanga wa Leta Zunze Ubumwe z’Amerika wungirije ushinzwe umubano na Afrika, Molly Phee, yavuze ko Uhuru Kenyatta wabaye perezida wa Kenya yiyemeje guhuza Leta ya Kinshasa n’umutwe wa M23.
Molly watanze aya makuru, yayavuze mu gihe ibiganiro byagombaga guhuriza perezida Félix Tshisekedi, Paul Kagame na João Lourenço i Luanda tariki ya 15/12/2024 byasubitswe bitewe n’uko Leta ya Kinshasa yanze kuganira n’umutwe wa M23, uwo bahanganye mu Burasirazuba bwa Repubulika ya demokarasi ya Congo.
Ubwo ibyo biganiro byasubikwaga, Uhuru Kenyatta na perezida Lourenço bahuriye i Luanda, kugira barebere hamwe uko amahoro n’umutekano birambye byagaruka mu Burasirazuba bwa RDC.
Mu byo aba bayobozi baganiriye harimo ko ibiganiro bya Leta ya Kinshasa n’imitwe yitwaje intwaro ikorera mu Burasirazuba bw’iki gihugu byasubukurwa; M23 na yo ikabijamo.
Molly yanatangaje ko nyuma y’uko Uhuru Kenyatta yiyemeje gutegura ibiganiro bihuza M23 na Leta ya Kinshasa, umuryango wa Afrika y’iburasirazuba (EAC) wemeje ko bishyirwa mu maboko ya Afrika yunze ubumwe.
Yagize ati: “Uhuru yemeye gutanga ubufasha bwo gutegura ibiganiro hagati ya M23 na Leta ya Kinshasa. EAC na yo yarabishigikiye, yemeza ko inshingano yo gukemura ibibazo by’imitwe yitwaje intwaro mu Burasirazuba bwa RDC yimurirwa muri AU.”
Umutwe wa M23 wigeze kwitabira ibiganiro bya Nairobi mu kwezi kwa 4, 2022, yirukanwamo n’intumwa ya perezida Félix Tshisekedi, ubwo yayishinjaga kubura imirwano gusa yasubije ko ari ikinyoma.
Ibyo bibaye kandi mu gihe Leta ya Kinshasa ikomeje kwotswa igitutu ngwiganire na M23, kugira ngo bikemurire hamwe ibibazo bafitanye bimaze imyaka myinshi.
