Abarwanyi ba FDLR bongeye kwisuganya begera mu Bijojwe.

Abarwanyi ba FDLR bongeye kwisuganya begera mu Bijojwe.

Umutwe w’iterabwoba urwanya Leta y’u Rwanda, FDLR, ukomeje kwegera uduce tubarizwamo Twirwaneho two muri Rurambo muri teritware ya Uvira. Kuri ubu abo barwanyi bari ahitwa kuri Nyundo.

Aha Nyundo ni agace kamwe mutugize umusozi wa Mulenge nyirizina, akaba ari ku marango yunamiye i Lemera.

Byavuzwe ko aba barwanyi ba FDLR bubatse ibitunda muri aka gace ka Nyundo, nyuma y’uko bari baheruka guhunga bava mu bice byo muri Mwenga, aho ndetse baje bahitira mu Gitoga banakirwa n’umutwe wa Gumino hamwe na Maï Maï.

Uyu mutwe wa FDLR, wavuzwe cyane mu Rurambo ahagana mu ntangiriro z’ukwezi kwa Cyenda uyu mwaka, ni mu gihe abawugize bahageze nyuma yoguhanga bava mu mashyamba ya Mwenga, ubwo u Rwanda na RDC mu nama y’i Luanda byari byumvikanye ku rwanya bakarandura uwo mutwe.

Ubwo bageraga mu Rurambo baje bari kumwe n’abana, n’abagore, n’imizigo myinshi, irimo imbunda n’amasasu n’ibindi bikoresho bya gisirikare.

Amakuru avuga ko bahitiye mu Gitoga ariko ntibahamaze n’ibyumweru bibiri, ahubwo bahise bahava baja ku misozi iri mu nkengero za Nyarurambi. None kuri ubu bari ahitwa Nyundo, aha akaba ari imisozi yegereye mu Bijojwe, aho Twirwaneho irindira umutekano w’Abaturage ba Banyamulenge bagabwaho ibitero bya Maï Maï.

Nubwo ibi bikomeje gutera urujijo abaturage baturiye ibice byo muri Rurambo, ariko umwe mu bagize Twirwaneho yabwiye MCN, ati: “FDLR, iri kwisuganya yegera aho turi, ariko turi maso. Nta kibazo. Baraho bita kuri Nyundo.”

Aya makuru anahamya ko aba barwanyi bagikomeje gukorana byahafi n’umutwe wa Gumino, kuko aha kuri Nyundo bari kumwe n’uwitwa Nzeyimana uri mu bayobozi bakomeye muri Gumino.
Ndetse kandi bari kumwe n’abandi barwanyi ba Maï Maï n’abo mu Mbonerakure.

Ku rundi ruhande, muri Rurambo, intambara ya Maï Maï yarisa nimaze kugira iherezo, ariko ubu hari umutekano muke kubera izo nterahamwe zimaze amezi arenga abiri zihindagura ibyicaro.