AFC/M23 Yasobanuye Imigendekere y’Ingabo zayo ku Mirongo y’Urugamba, Ishimangira Kwiyemeza Amahoro no Kurinda Abasivili
Ihuriro Alliance Fleuve Congo (AFC/M23) ryatangaje ku mugaragaro rimenyesha abatuye imbere mu gihugu no ku rwego mpuzamahanga ko ibikorwa biri kugaragara muri iki gihe ku mirongo itandukanye y’urugamba atari ibintu bishya, ahubwo ari ihinduranya risanzwe kandi rishingiye ku igenamigambi ry’ingabo zaryo zizwi ku izina ry’Ingabo za ARC (Armée Révolutionnaire Congolaise).
Nk’uko iri huriro ribisobanura, iri hinduranya (rotation) ry’ingabo ni igikorwa gisanzwe mu mikorere ya gisirikare, kigamije gusimbuza abasirikare bari bamaze igihe ku rugamba, kubaruhura no kongera gutegura neza imbaraga z’ingabo mu buryo burambye. Ibi bikorwa kandi bifasha mu kongera imbaraga n’imitegurire myiza ku mirongo y’imbere, bityo bigatuma habaho gucunga neza umutekano w’uturere bagenzura.
AFC/M23 yongeye gushimangira ko ifite ubushake buhamye kandi budashidikanywaho bwo kubahiriza ingamba zose zubaka icyizere hagati y’impande ziri mu biganiro by’amahoro biri kubera i Doha, muri Qatar. Iri huriro rivuga ko rikomeje gushyigikira inzira y’amahoro, rikaba ryiyemeje gukorana n’abandi bose bagamije kugarura ituze rirambye mu burasirazuba bwa Repubulika Iharanira Demokarasi ya Congo.
Mu rwego rwo kugaragaza inshingano zaryo, AFC/M23 ivuga ko izakomeza gushyira imbere kurinda abaturage b’abasivili, by’umwihariko abatuye mu bice byibasiwe n’intambara n’umutekano muke umaze igihe muri aka karere. Iri huriro rinashimangira ko ryiteguye guhangana n’ikintu cyose cyahungabanya umutekano, aho cyaturuka hose, hagamijwe gukumira ibibazo mbere y’uko byiyongera.
AFC/M23 ni ihuriro rimaze igihe rigaragara mu ntambara zo mu burasirazuba bwa Repubulika Iharanira Demokarasi ya Congo, cyane cyane mu ntara ya Kivu y’Amajyaruguru na Kivu y’Amajyepfo. Mu mateka y’aka karere, ikibazo cy’umutekano muke cyagiye gishingira ku mpamvu zitandukanye zirimo amoko, ubukungu n’inyungu z’ibihugu by’ibituranyi.
Mu myaka yashize, habayeho ibiganiro byinshi by’amahoro byagiye bikorwa hagamijwe gushakira umuti urambye iki kibazo, aho ibiganiro bya Doha biri mu bikomeje kwitabwaho ku rwego mpuzamahanga. Ibi biganiro bigamije guhuza impande zose zifitanye amakimbirane hagamijwe kugera ku masezerano arambye y’amahoro.
Nubwo hari intambwe zimwe na zimwe zatewe, ibikorwa bya gisirikare bikomeje kugaragara rimwe na rimwe, bigatuma hakomeza kubaho impungenge ku mutekano w’abaturage. Ni muri urwo rwego AFC/M23 ishaka kugaragaza ko ibikorwa biri kuba ubu bidakwiye gusobanurwa nabi, ahubwo ko ari ibisanzwe mu mikorere y’ingabo.
Mu gusoza, iri huriro rihamagarira impande zose gukomeza gushyira imbere ibiganiro n’ubwumvikane, kuko ari byo byonyine byazana amahoro arambye n’iterambere mu karere kamaze igihe karangwa n’umutekano muke.
