Amakuru aturuka muri centre ya Masisi aremeza uyigenzura hagati ya M23 na FARDC.
Umwe mu bayobozi wo mu mutwe wa m23 usanzwe ayoboye batayo yemeje ko umujyi munini wa teritware ya Masisi ugenzurwa n’ingabo z’uyu mutwe, kandi ko zidateze kuwuvamo.
Ni amakuru uyu muyobozi utashatse ko amazina ye aja hanze kumpamvu z’uko atemerewe gutanga amakuru, ubwo yavuganaga na Minembwe.com ahagana isaha ya saa tanu z’ijoro ryaraye rikeye rishyira kuri uyu wa Kane tariki ya 09/1/2025 yahamije ko centre ya Masisi igenzurwa n’ingabo zabo.
Mu byo yemeje yagize ati: “Masisi iracyari iyacu, kandi ntiduteze kuyirekura. Njye ndi muri Masisi ibindi wumva ku ruhande ni ibihuha.”
Nyamara ku rundi ruhande umudepite ku rwego rw’intara ya Kivu y’Amajyaruguru, Alexis Bahunga, ahagana isaha z’umugoroba w’ahar’ejo tariki ya 08/01/2025 yatangaje ko ingabo z’igihugu cya RDC na Wazalendo bigaruriye iriya centre, ndetse ahamya ko zanigaruriye n’utundi duce tuyikikije turimo Mashaki.
Yagize ati: “Ndahamya ko centre ya Masisi FARDC na Wazalendo bayifashe, ndetse kandi bafashe na Localité Lushebere na Mashaki. Igisigaye ni uko Guverinoma yacu ikomeza gushigikira Wazalendo mu kubaha intwaro zikomeye kugira ngo bakomeze gutsinda umwanzi.”
Nubwo depite Alexis Bahunga yemeje aya makuru, ntacyo umuvugizi wa FARDC arayavugaho, ibyanatumye benshi mu Banye-Kongo bakurikiye ibyo yatangaje akoresheje urubuga rwa x, bamwamaganye bamusaba kujya yitonda kugira icyo atangaza mbere ya FARDC.
Karaken yagize ati: “Biratangaje kubona umudepite watowe n’abaturage ababesha. Ingabo z’igihugu ntacyo ziremeza, wewe ubikurahe? Nkaba ari wewe wayifashe!”
Uyu mudepite watangaje ibi, ni nawe kandi wari watangaje ku wa mbere w’iki Cyumweru ko Ngungu yigaruriwe n’ingabo z’igihugu nyuma y’uko amezi icyenda ashize igenzurwa n’umutwe wa M23.
Umurwanyi wo muri m23 wavuganaga na Minembwe.con, nyuma yokubona ibyatangajwe n’uriya mudepite yamusetse cyane, maze ashimangira ko centre ya Masisi igenzurwa nabo, aho yagize kandi ati: “Ndamusetse cyane, ndi muri Masisi centre. Kandi haratuje nta mirwano yahabereye kuva mu gitondo.”
Ku wa gatanu w’icyumweru gishize ni bwo abarwanyi ba M23 bigaruriye centre ya Masisi, nyuma y’imirwano ikaze hagati yabo n’ihuriro ry’ingabo zirwana ku ruhande rwa Leta.
Urugamba rwo gufata uriya mujyi w’ingenzi muri Kivu y’Amajyaruguru, amakuru yatangajwe icyo gihe yavuga ko rutari rworoshye namba, ni mu gihe rwamaze iminsi ibiri, maze ku munsi wa gatatu M23 yirukana ingabo zo ku ruhande rwa Leta muri aka gace.
