Breaking News: Uvira hari kumvikana urusaku rw’amasasu menshi mu gihe igice cya Mwenga centre cyageze mu maboko ya AFC/M23/MRDP
Umujyi wa Uvira, uherereye mu Ntara ya Kivu y’Amajyepfo, urimo kumvikanamo urusaku rw’amasasu menshi rwatangiye kumvikana mu masaha ya saa tatu z’ijoro (21:00), kuri uyu wa Gatanu tariki ya 28/11/2025. Abaturage bo muri Quartier Mulongwe, Kakungwe n’utundi duce twegereye aho, batangaje ko bari mubwoba bwinshi nyuma y’ibiturika bikomeje kumvikana muri ibi bice batuyemo, aho banasabwe kwikingirana mu ngo zabo.
Nta nzego za gisirikare cyangwa iz’umutekano zari zabasha gutanga itangazo rifatika kuri iki kibazo kugeza ubu. Gusa amakuru y’abaturage agaragaza ko amasasu akomeje kumvikana mu bice bitandukanye, ndetse ko hari ubwoba bwiyongereye mu baturage basaba ubuyobozi gutanga ibisobanuro no kongera ubwirinzi mu mujyi.
Iri hungabana ry’i Uvira rije mu gihe amakuru yo mu karere ka Mwenga akomeje gutera impungenge. Amakuru yemezwa n’abahatuye avuga ko umutwe wa AFC/M23/MRDP-Twirwaneho wamaze gufata igice kinini cya centre ya Mwenga ku mugoroba wo kuri uyu wa Gatanu. Abasirikare ba FARDC nabo bafite ikindi gice cya centre, mu gihe ihangana ryo rigikomeje.
Umwe mu batanze ubuhamya yagize ati:
“Ku mugoroba wo kuri uyu wa Gatanu, AFC/M23/MRDP-Twirwaneho yafashe igice kinini cya centre ya Mwenga. FARDC n’abayifasha baracyari mu kindi gice.”
Yakomeje agira ati:
“Biragaragara ko AFC/M23/MRDP-Twirwaneho ikomeje kwigarurira uduce twinshi, kandi ibintu biri guhinduka buri mwanya.”
Hagati aho abaturage bo mu bice biri kuberamo imirwano bakomeje gukurikiranira amakuru ku mbuga nkoranyambaga no gusaba ko umutekano wakazwa ndetse kandi bagasaba inzego za leta kubaha amakuru ajanye n’ibihe barimo n’ikiri gukorwa kugira ngo batekane.
Turakomeza kubakurikiranira iby’iyi nkuru mu gihe amakuru mashya agenda aboneka.
