C64 Byayikomeranye: Nyuma y’Urugendo i Burundi, Haravugwa Urundi Rugendo rw’Iri Huriro mu Kindi Gihugu
MINEMBWE CAPITAL NEWS
Mu gihe Repubulika Iharanira Demokarasi ya Congo (RDC) ikomeje guhangana n’ibibazo bya politiki n’umutekano, amakuru akomeje gukwirakwira mu bitangazamakuru no mu nzego za politiki avuga ko ihuriro ry’abatavuga rumwe n’ubutegetsi rya C64 riri gutegura urundi rugendo i Oyo, muri Repubulika ya Congo, aho Perezida Denis Sassou Nguesso atuye.
Nubwo kugeza ubu nta tangazo ryemewe n’amategeko riratangazwa n’impande bireba ryemeza ko uru rugendo ruzaba, bamwe mu bagize iri huriro bakomeje kubigaragariza ibitangazamakuru.
Aya makuru aje nyuma y’ibiganiro C64 iherutse kugirana na Perezida Évariste Ndayishimiye i Bujumbura, byibanze ku gushakira Repubulika Iharanira Demokarasi ya Congo umuti w’ibibazo bya politiki n’umutekano binyuze mu biganiro bihuza impande zose. Nyuma y’iyo nama, C64 yemeye gusubika imyigaragambyo yari yateganyijwe kugira ngo ihe amahirwe inzira y’ibiganiro.
Nk’uko C64 yabitangaje, intego yayo ni uko habaho ibiganiro bya politiki bihuriweho n’impande zose, bikaganira ku bibazo by’umutekano mu burasirazuba bw’igihugu, imiyoborere, ubukungu, imibereho y’abaturage ndetse no kubahiriza Itegeko Nshinga. Iri huriro ryahaye ubutegetsi kugeza ku wa 15/08/2026 kugira ngo ibyo biganiro bibe byaratumijwe ku mugaragaro; bitaba ibyo, rikavuga ko rizafata izindi ngamba za politiki zirimo kongera gutegura ibikorwa byo kugaragaza ibitekerezo byaryo mu mahoro.
Nubwo amakuru y’uru rugendo rushobora kujya i Oyo akomeje kuvugwa, abasesenguzi babona ko, niba rwabaho, rwaba rugamije gushaka ubuhuza bw’undi muyobozi ukomeye wo mu karere kugira ngo hashyigikirwe ibiganiro bya politiki no kugabanya umwuka mubi hagati y’ubutegetsi n’abatavuga rumwe na bwo. Gusa, ibi bikomeje kuba ibivugwa, kuko nta rwego rwa C64 cyangwa urwa Perezida Denis Sassou Nguesso rurabyemeza ku mugaragaro.
Ku ruhande rwa Perezida Félix Tshisekedi, amaze gutangaza ko yiteguye gushyigikira ibiganiro bya politiki birimo impande zitandukanye, ariko ashimangira ko bigomba gukorwa hubahirijwe inzego za Repubulika n’Itegeko Nshinga. Ibi byakurikiye ibiganiro yagiranye n’abayobozi ba CENCO na ECC, basabye ko habaho inzira y’ibiganiro aho gukomeza ubushyamirane bwa politiki.
Nubwo bimeze bityo, abatavuga rumwe n’ubutegetsi bakomeje kuvuga ko amagambo yonyine adahagije, ahubwo bategereje ibikorwa bifatika birimo gutumiza ku mugaragaro ibiganiro no gufata ingamba zituma habaho icyizere hagati y’impande zose. Banakomeje gushimangira ko bamagana icyo bita umugambi uwo ari wo wose wo guhindura Itegeko Nshinga mu buryo bwatuma manda z’Umukuru w’Igihugu ziyongera.
Mu gihe amaso yose akomeje kureba niba urugendo ruvugwa i Oyo ruzaba cyangwa rutazaba, ndetse n’icyemezo ubutegetsi bwa Kinshasa buzafata mbere y’itariki ya 15/08/2026, benshi mu bakurikiranira hafi politiki ya RDC bemeza ko ibyumweru biri imbere bishobora kuzagena icyerekezo cy’ibiganiro n’imikoranire hagati y’ubutegetsi bwa Perezida Félix Tshisekedi n’abatavuga rumwe na bwo.
