I Sake habyukiye urugamba rukomeye hagati ya M23 na FARDC.
Muri iki gitondo cyo kuri uyu wa mbere tariki ya 20/01/2025, mu nkengero z’umujyi wa Sake wo muri teritware ya Masisi mu Ntara ya Kivu y’Amajyaruguru, mu Burasirazuba bwa Repubulika ya demokarasi ya Congo, habyukiye imirwano ikaze aho ihanganishije ihuriro ry’Ingabo za RDC n’umutwe wa M23.
Iyi mirwano yatangiye igihe c’isaha ya saa kumi nimwe z’igitondo cyo kuri uyu wa mbere ikaba igikomeje.
Aya makuru avuga ko iyi mirwano ikomeye aho umutwe wa M23 wamaze kuzenguruka uyu mujyi, bikanavugwa ko udusozi twose twunamiye sake duhagazeho abarwanyi bo muri uyu mutwe wa M23.
Ni amakuru anavuga kandi ko ibiturika byinshi birimo kumvikana impande zose zikikije Sake, ahanini mu duce two muri grupema ya Kamuronza n’ahandi.
Gusa bikavugwa ko abarwanyi bayobowe na Gen Sultan Makenga bafite imbaraga zidasanzwe, kandi ko bashobora kwigarurira uyu mujyi uherereye mu birometero nka 27 uvuye mu mujyi wa Goma ufatwa nk’umurwa mukuru w’i Ntara ya Kivu Yaruguru.
Ibyo bibaye mu gihe uyu mutwe wa M23 wegereje gufata n’umujyi wa Minova uri muri teritware ya Kalehe mu Ntara ya Kivu y’Amajy’epfo, ni mu gihe abarwanyi b’uwo mutwe bafashe uduce turi mu nkengero zayo, agace ka Numbi n’ahandi nka hitwa Lumbishi.
Abasesenguzi bavuga ko mu gihe M23 yaramuka ifashe centre ya Minova na Sake, ingabo zirwana ku ruhande rwa Leta zahita zivana muri Goma.
Nyamara kandi imirwano ikomeje kubica bigacika mu Burasirazuba bwa RDC mu gihe perezida w’iki gihugu, Félix Tshisekedi yari aheruka gutangaza ko atazigera aganira n’umutwe wa M23. Akaba yaranise uyu mutwe urwanira ukubaho kwabo “umutwe w’iterabwoba.”
