Imirwano ikaze muri Lubero hagati ya M23 n’ingabo za RDC.
Ni imirwano ihuriro ry’ingabo za Repubulika ya demokarasi ya Congo(FARDC), zakoreshejemo indege z’intambara, imbunda ziremereye n’ibisasu bigira ingaruka ku basivile.
Iyi mirwano yarushijeho gukara kuva mu mpera z’iki Cyumweru gishize n’ahar’ejo tariki ya 22/12/2024.
Umuvugizi wa M23 mu bya gisirikare, Lt Col Willy Ngoma mu butumwa bwe yatambukije muri iki gitondo cyo kuri uyu wa mbere, bugaragaza ko uruhande rwa Leta ruri gukoresha ibisasu bigira ingaruka ku basivile.
Yagize ati: “Ingabo za FARDC n’abambari bayo, bari kurasisha za kajugujugu z’intambara, imbunda nini cyane, ndetse kandi bari gutera ibisasu biremereye ahatuwe n’abaturage; igitangaje ibyo bisasu bigira ingaruka ku basivile.”
Muri aka karere ka Lubero gaherereye mu birometero nka 150 uvuye mu mujyi wa Goma, ingabo za FARDC, SADC, FDLR, Wazalendo n’ingabo z’u Burundi nubwo zakoresheje ibibunda bikaze, ariko amakuru avayo avuga ko uriya mutwe uri kubirukana muri utwo duce.
Mu minsi ibiri ishize impande zombi zakunze guhanganira ku muhanda wa Mambasa-Nduta kuri RN2 werekeza i Lubero Centre ku murwa mukuru w’iyi teritware.
Hari amakuru avuga ko uruhande rwa Leta rwabanje kwisubiza agace ka Mambasa na Kanyabi, ariko ko M23 yahise yongera kudufata twombi, ndetse ibuza iz’i ngabo gukomeza zerekeza Alimbongo, nk’uko zari zabitangaje.
Kuva mu Cyumweru gishize, ibitero by’ingabo za Leta ya Kinshasa bikomeje kuyoborwa na Major Gen Bruno Mandevu wasimbuye Gen Chiko Jérôme wari usanzwe ayobora ibikorwa bya gisirikare mu ntara ya Kivu y’Amajyaruguru akaba aheruka guhindurirwa inshingano zo kuyobora zone ya mbere y’igisikare cy’iki gihugu(1ère zone de défense).
