Intambwe Ishobora Gukaza Umwuka w’Intambara Hagati ya Israel n’Abanya-Palestine
Guverinoma ya Isiraheli yemeje gahunda nshya igamije gutangira kwiyandikishaho ubutaka bwo mu gace ka West Bank nk’“ubutaka bwa Leta”. Iyi gahunda, nk’uko byatangajwe n’inzego za Leta ya Israel, igamije gushyira ku murongo imikoreshereze y’ubutaka no kunoza imiyoborere yabwo.
Icyakora, iyi ntambwe yakiriwe n’impaka zikomeye, aho abanenga ubutegetsi bwa Israel bayifata nk’intangiriro y’ikorwa ry’inyagwa ry’ubutaka bw’Abanya-Palestine mu buryo butaziguye.
Kwiyandikishaho ubutaka nk’ubwa Leta biha ubuyobozi bwa Israel uburenganzira busesuye bwo kubugenzura no kubugenera imikoreshereze. Abasesenguzi bagaragaza ko ibi bishobora koroshya itangwa ry’ubutaka ku baturage b’Abayahudi bashaka gutura muri utu duce, bakunze kwitwa abimukira (settlers), mu gihe ububasha bw’Abanya-Palestine ku butaka bwabo bukomeza kugabanuka.
Agace ka West Bank gafatwa nk’ingenzi mu biganiro bigamije gushaka umuti w’amahoro hagati ya Israel na Palestine. Abanya-Palestine, bafatanyije n’umuryango mpuzamahanga, basaba ko ako gace kazaba igice cy’igihugu cya Palestine cyigenga mu gihe kizaza.
West Bank yafashwe na Israel mu Ntambara y’Iminsi Itandatu yo mu 1967. Kuva icyo gihe, aka gace kabaye ishingiro ry’amakimbirane akomeye hagati ya Israel n’Abanya-Palestine.
Umuryango mpuzamahanga, ushingiye ku mategeko mpuzamahanga arimo n’Amasezerano ya Geneva, ufata aka gace nk’akagenzurwa na Israel by’agateganyo (occupied territories). Bityo, ibikorwa byo kwimuriramo abaturage ba Israel bikaba bifatwa na benshi nk’ibinyuranyije n’amategeko mpuzamahanga.
Mu myaka yashize, habayeho ibiganiro bitandukanye by’amahoro byayobowe n’ibihugu n’imiryango mpuzamahanga itandukanye, ariko ntibyigeze bigera ku musaruro urambye.
Ibihugu birimo Misiri, Qatar na Jordan byamaganye iyi gahunda, bivuga ko inyuranyije n’amategeko mpuzamahanga kandi ishobora gukoma mu nkokora inzira y’ibiganiro by’amahoro.
Abayobozi b’ibi bihugu bagaragaje ko kwiyandikishaho ubutaka bwa West Bank nk’ubwa Leta ya Israel bishobora gukaza umwuka mubi no guteza umutekano muke mu karere.
Ababikurikiranira hafi bagaragaza ko iyi gahunda ishobora kongera ubushyamirane hagati ya Israel n’Abanya-Palestine, gukaza igitutu cy’umuryango mpuzamahanga kuri Israel, no kudindiza ibiganiro by’amahoro byari bisanzwe bidatera imbere.
Mu gihe Israel ivuga ko igamije kunoza imiyoborere n’umutekano, abanenga iyi gahunda bayibona nk’intambwe igana ku gufata burundu igice cya West Bank.
Ibi byose byongera kugaragaza ko ikibazo cya Israel na Palestine gikomeje kuba kimwe mu bibazo bikomeye kandi birambye muri politiki mpuzamahanga, aho umuti urambye usaba ibiganiro byimbitse, kubahana no kubahiriza amategeko mpuzamahanga.
