Tehran na Tel Aviv byongeye kuba intumbero y’ibitero
Mu ijoro ryakeye, ingabo za Israel zizwi nka (IDF) zagabye ibitero bikomeye byo mu kirere ku murwa mukuru wa Iran, Tehran, mu gikorwa cyongeye kugaragaza ubukana bw’umwuka mubi uri hagati y’ibihugu byombi.
Nk’uko IDF yabitangaje, ibyo bitero byari bigamije gusenya ibikorwa remezo bifitanye isano n’ubutegetsi bwa Iran, cyane cyane ibice bikekwaho gukoreshwa mu bikorwa bya gisirikare cyangwa mu migambi y’umutekano w’imbere mu gihugu. Icyakora, Iran ntiyahise itangaza niba hari abapfuye cyangwa abakomeretse, cyangwa niba hari ibyangiritse ku buryo bugaragara.
Ibi bitero byakurikiwe n’igisubizo cya Iran, aho yoherereje misile eshatu ku butaka bwa Israel, zatewe mu bihe bitandukanye, bigaragaza uburyo impande zombi zikomeje gukoresha imbaraga za gisirikare mu kwihimura no kwirwanaho.
Mu nkengero z’umujyi wa Tel Aviv, imwe muri izo misile yakomerekeje abantu 14, barimo abana babiri—umukobwa w’imyaka 11 n’umuhungu w’imyaka 13—ibintu byongeye kongera impungenge ku mutekano w’abasivili.
Serivisi ishinzwe ubutabazi bwihuse muri Israel, Magen David Adom, yatangaje ko uwo mukobwa yakomeretse bikomeye bitewe n’ibice by’amasasu (shrapnel), ahita ajyanwa kwa muganga kugira ngo yitabweho byihuse. Iyi serivisi yongeyeho ko nta bandi bantu bagize ibikomere bikomeye byatewe n’icyo gitero.
Umubano hagati ya Israel na Iran umaze imyaka myinshi urangwa n’ubwumvikane buke n’ubushyamirane bukomeye. Nyuma ya revolisiyo yo mu 1979 yahinduye ubutegetsi bwa Iran, iki gihugu cyafashe umurongo ukomeye wo kwamagana Israel, kiyifata nk’umwanzi ukomeye mu karere ka Middle East.
Kuva icyo gihe, impande zombi zakomeje guhangana mu buryo butaziguye n’ubutaziguye, harimo intambara z’inyuma (proxy wars) mu bihugu nka Syria na Lebanon, aho Israel ikunze kugaba ibitero ku mitwe ifitanye isano na Iran, nka Hezbollah.
Mu bihe bya vuba, umwuka mubi warushijeho gukara bitewe n’impungenge za Israel ku bijyanye na gahunda ya Iran yo guteza imbere ingufu za nikereyeri, Israel ikaba iyibona nk’ishobora guteza akaga ku mutekano wayo.
Ibitero byo mu kirere n’ibisubizo bya misile bikomeje kugaragaza ko hari impungenge z’uko iyi mirwano ishobora gukomeza kwaguka, ikaba yakwibasira n’ibindi bihugu byo mu karere. Abasesenguzi mpuzamahanga bagaragaza ko kuba nta ruhande rushaka guca bugufi bishobora gutuma ibintu birushaho gukomera.
Nubwo kugeza ubu ibyangiritse n’umubare w’abahitanwa n’ibi bitero bikiri bike ugereranyije n’intambara yeruye, gukomeza kwiyongera kw’ibi bitero bishobora kuzana ingaruka zikomeye ku mutekano w’akarere ndetse n’isi muri rusange.
Mu gihe amahanga akomeje guhamagarira impande zombi kugabanya ubushyamirane no kugana inzira y’ibiganiro, haracyari impungenge z’uko igikorwa gito gishobora guteza intambara yeruye hagati y’ibi bihugu bibiri bifite imbaraga za gisirikare zikomeye mu karere.