Kivu y’Epfo: Abayobozi Bashya Bashyizwe ku Buyobozi bwa Bukavu n’Amakomini Ayigize

Ihuriro Alliance Fleuve Congo (AFC/M23) ryashyizeho abayobozi bashya muri Kivu y’Epfo, bashinzwe kuyobora Umujyi wa Bukavu ndetse n’amakomini awugize. Aya makuru akubiye mu itangazo AFC/M23 yashyize ahagaragara, rigaragaza ko iki cyemezo kiri mu rwego rwo gukomeza kunoza imiyoborere y’inzego z’ibanze mu bice bigenzurwa n’iri huriro rya Alliance Fleuve Congo (AFC).

Nk’uko bigaragara muri iryo tangazo, Nicolas Kyalangalilwa Mulondani yagizwe Meya w’Umujyi wa Bukavu, mu gihe Céline Nyota Luandja yagizwe Umwungirije. Muri Komini ya Bagira, Shaka Muhoza yagizwe Burugumesitiri, yungirijwe na Léon Bahaya. Muri Komini ya Ibanda, Prisca Mweze yagizwe Burugumesitiri, yungirijwe na Mutunwa Mbulanga. Naho muri Komini ya Kadutu, Théo Ruremesha yagizwe Burugumesitiri, yungirijwe na Pascaline Cikuru Barhakaziga.

Iyi gahunda yo gushyiraho abayobozi bashya ije mu gihe AFC/M23 ikomeje kwagura no gushimangira inzego z’ubuyobozi mu bice igenzura, nyuma y’impinduka zikomeye zabaye mu ntangiriro za 2025, ubwo Bukavu n’ibice byinshi bya Kivu y’Epfo byajyaga mu maboko yayo.

Abakurikiranira hafi ibibera mu burasirazuba bwa Repubulika Iharanira Demokarasi ya Congo bavuga ko gushyiraho abayobozi bashya b’inzego z’ibanze ari imwe mu ngamba zigamije gusubiza ibikorwa by’ubuyobozi ku murongo no koroshya itangwa rya serivisi ku baturage.

Mu mezi ashize, abaturage bo muri Bukavu bagiye bagaragaza ibibazo byaterwaga no kutamenya neza ubuyobozi bubafiteho inshingano, cyane cyane nyuma y’impinduka zatewe n’intambara. Gushyiraho abayobozi b’amakomini n’ab’umujyi bishobora gufasha mu guhuza ibikorwa by’umutekano, isuku, imisoro, ubutabera n’indi mirimo ya buri munsi ikenerwa n’abaturage.

Kuva AFC/M23 yafata Bukavu n’utundi duce twa Kivu y’Epfo, yakomeje gutangaza ko intego yayo atari ugutsinda ku rugamba gusa, ahubwo ko ishaka no kubaka inzego z’imiyoborere zikorera abaturage.

Mu bice igenzura, AFC/M23 yavuze ko yashyize imbaraga mu gusubukura ibikorwa by’ubuyobozi, gufungura imihanda imwe n’imwe yari yarangiritse, koroshya urujya n’uruza rw’abaturage ndetse no gukomeza ibikorwa by’ubucuruzi hagati ya Bukavu n’utundi duce twa Kivu y’Epfo. Hari kandi ibikorwa by’ubukangurambaga ku mutekano n’isuku byagiye bitangazwa mu bice bitandukanye.

Abaturage bamwe bavuga ko kuba hari abayobozi bashyizweho ku rwego rw’umujyi n’amakomini bishobora gutuma ibibazo byabo byumvwa no gukemurwa vuba kurushaho, mu gihe abandi bagaragaza ko hakiri byinshi byo gukorwa kugira ngo serivisi z’ibanze zisubire ku rwego rwifuzwa.

Bukavu ni umurwa mukuru w’Intara ya Kivu y’Epfo, akaba umwe mu mijyi ikomeye mu burasirazuba bwa Repubulika Iharanira Demokarasi ya Congo. Uyu mujyi ugizwe n’amakomini atatu ari yo Bagira, Ibanda na Kadutu, kandi ufite uruhare runini mu bucuruzi, ubwikorezi n’ikorwa ry’ibindi bikorwa by’ubukungu mu karere k’Ibiyaga Bigari.

Kuva intambara yubuye mu burasirazuba bwa RDC, Bukavu yabaye kimwe mu bice by’ingenzi byagiye bihindurirwamo uburyo bw’imiyoborere n’imikorere y’inzego za Leta, ibintu byatumye abaturage b’iki gihugu ndetse n’amahanga bayikurikirana cyane.