MINEMBWE: MRDP-Twirwaneho Yakubise Inshuro Ingabo z’u Burundi na FARDC
Amakuru mashya aturuka mu misozi miremire y’i Mulenge, mu karere ka Minembwe ho mu ntara ya Kivu y’Amajyepfo, aragaragaza ko imirwano yongeye gukara hagati y’umutwe wa MRDP-Twirwaneho n’ihuriro ry’ingabo zirimo iza Repubulika Iharanira Demokarasi ya Congo (FARDC), iz’u Burundi, ndetse n’imitwe yitwaje intwaro irimo Wazalendo na FDLR.
Nk’uko amakuru atandukanye aturuka muri ako gace abivuga, iri huriro ry’ingabo ryagabye igitero mu bice bya Kalingi, ahagana ku isoko rizwi nka Gatatu, mu gace ka Bidegu. Aha ni mu hantu havugwamo guturwa cyane n’Abanyamulenge, aho umutekano umaze igihe uhungabana.
Mu gusubiza icyo gitero, MRDP-Twirwaneho ivugwaho guhita itabara iturutse mu gace ka Kalingi, hafi yo kwa Reverend Mugenza Gatabana. Amakuru avuga ko habaye imirwano ikomeye, aho uyu mutwe uvugwaho kurengera abaturage wahanganye n’izo ngabo zirwana kuruhande rwa Leta y’i Kinshasa, ukazitsinsura ku rugamba.
Ubuhamya bw’umwe mu baturage wavuganye na Minembwe Capital News bugaragaza ko izi ngabo z’u Burundi, iza FARDC hamwe na Wazalendo na FDLR zasubijwe inyuma ku rugamba. Uwo muturage yagize ati:
> “Ingabo z’u Burundi, iza FARDC, hamwe na Wazalendo na FDLR zatsinzwe cyane, zirirukanwa zambutswa uruzi rwa Rwiko, zerekeza mu gace ka Bicumbi.”
Ibi bitero n’iyi mirwano bikomeje kugaragaza ubukana bw’umutekano muke mu Minembwe no mu bice biyikikije, aho ingabo za FARDC, iz’u Burundi n’imitwe myinshi yitwaje intwaro bakorana zikomeje kugaba ibitero mu mihana ituwe n’Abanyamulenge.
Kugeza ubu, uburasirazuba bwa RDC bukomeje kuba isibaniro ry’imirwano ihuza ingabo za Leta na MRDP-Twirwaneho, ndetse n’ingabo z’amahanga zivugwaho gufasha FARDC mu bikorwa bya gisirikare. Minembwe ni hamwe mu hantu hakunze kuvugwamo amakimbirane ashingiye ku bibazo by’amoko, ubutaka n’umutekano.
Nubwo hari ibiganiro by’amahoro bikomeje ku rwego mpuzamahanga, cyane cyane ibigamije guhosha imirwano iri mu burasirazuba bwa Congo, ibikorwa bya gisirikare ku butaka bikomeje kwiyongera, bigatuma abaturage basanzwe barushaho guhura n’ingaruka zirimo kwimurwa, kubura umutekano ndetse n’ibura ry’ibyangombwa by’ibanze.
Ibi bitero byagabwe mu Minembwe byongera kugaragaza ko ikibazo cy’umutekano mu burasirazuba bwa RDC kigikomeye, kandi ko gikomeje gusaba igisubizo kirambye gishingiye ku biganiro bya politiki n’ubwumvikane, aho gukomeza inzira y’intambara ituma abaturage basanzwe ari bo bahora bahura n’ingaruka zikomeye.
