Mu Rwanda komisiyo ishinzwe amatora yaraye itangaje amajwi y’agateganyo, abatsinzwe bashimira kandida Paul Kagame wegukanye intsinzi ku majwi ari hejuru cyane.
Igihe c’isaha z’ijoro zo ku wa mbere, itariki ya 15/07/2024, nibwo komisiyo y’amatora yatangaje ibyavuye mu matora y’Abanyarwanda batoye ku wa mbere ndetse n’ayabatoreye mu mahanga.
Nk’uko bigaragara ibyavuye mu matora by’agateganyo, umukandida w’ishyaka rya RPF Inkotanyi Paul Kagame yaje ku isongo n’amajwi 99.14.
Yakurikiwe na Frank Habineza wo mu ishyaka riharanira Demokarasi no kurengera ibidukikije yabonye amajwi 0.53 ku ijana naho umukandida wigenga Philipe Mpayimana yegukanye amajwi 0.32.
Ibi bikaba byatangajwe na komisiyo ishinzwe amatora iyobowe na Oda Gasinzigwa.
Amajwi arenga miliyoni 7 mu yarenga miliyoni 9 niyo amaze kubarurwa.
Nyuma y’uko iyi komisiyo imaze gutangaza, Dr Frank Habineza yavuze ko yatsinzwe ashimira umukandida Paul Kagame wegukanye iyintsinzi.
Yagize ati: “Banyarwanda Banyarwandakazi, mu kanya kashize tumaze kubona ibivuye mu matora y’agateganyo bitangajwe na komisiyo y’igihugu ishinzwe amatora. Turagira ngo dutangaze ko twabyakiriye , kandi y’uko duhaye ishimwe cyangwa felicitations nyakubahwa Kagame Paul bimaze kugaragazwa ko yabonye amajwi tumuhaye felicitation.”
MCN.
