Ntacyo yasengeye, ariko yakoze amateka: Uko Papa Léon XIV yasuye Blue Mosque
Papa Léon XIV, Umushumba wa Kiliziya Gatolika ku Isi, yatanze urugero rw’ubwubahane n’ubworoherane bw’amadini ubwo yasuraga umusigiti wa Blue Mosque mu mujyi wa Istanbul muri Turikiya. Nubwo atasenganye n’abayisilamu bahasengera, yinjiyemo yambaye amasogisi y’umweru, akuramo inkweto nk’ikimenyetso cyo kubaha aho hantu hatagatifu.
Iyi ni inshuro ya mbere Papa Léon XIV yinjira mu musigiti kuva atorewe kuyobora Kiliziya Gatolika. Yahamaze iminota 20 atambagizwa n’abayobozi b’umusigiti, ananyuzamo agaseka n’abari bamuherekeje, ariko ntiyifatanya nabo mu isengesho.
Uwarushinzwe kumutembereza, Askin Musa Tunca, yabwiye itangazamakuru ko yamubajije niba yifuza gusenga, Papa amusubiza ko yaje mu ruzinduko rwo gusura no kuzirikana.
Itangazo rya Vatican ryasohotse nyuma rivuga ko uruzinduko rwa Papa ryari rigamije “guteza imbere ubwubahane, ubumwe n’ubwumvikane hagati y’amadini, cyane cyane hagati ya Gikirisitu na Islam.
Mu gihe bari basoje uruzinduko, habaye akanya ko guseka ubwo Papa yabonye icyapa cyanditseho ngo “Nta gusohoka” hafi y’urwinjiriro, maze abwira Tunca ati: “Handitse ngo nta gusohoka,” undi na we aramusubiza ati: “Nta bwo ukwiye gusohoka, guma hano.”
Uyu musigiti wa Blue Mosque, wakira abarenga ibihumbi 10, ni umwe mu hasurwa cyane muri Turikiya. Papa Léon XIV yabaye uwa gatatu mu batambagijwe muri uyu musigiti, akurikiye Papa Benedict XVI (2006) na Papa Francis (2014). Papa John Paul II ni we wa mbere mu mateka ya Kiliziya Gatolika wasuye umusigiti mu 2001 ubwo yaganaga muri Syria.
Kuva icyo gihe, ba Papa bane bamaze kugaragara mu bikorwa byo gusura imisigiti no guhura n’abayobozi b’idini ya Islam, nk’ikimenyetso cy’ubutumwa bwo gusenyera umugozi umwe mu kwimakaza amahoro, ubworoherane n’ubwumvikane mu Isi yugarijwe n’amakimbirane y’amadini.
Uruzinduko rwa Papa Léon XIV muri Turikiya rurakomeza kugeza ku wa 30/11/2025, aho azakomereza urugendo rwe muri Liban.
